MANILA, Philippines – Inaprubahan ng House Infrastructure Committee nitong Martes ang isang mosyon para imbitahan sina Ako Bicol party-list Rep. Zaldy Co at dating Sen. Grace Poe sa pagtatanong nito sa kontrobersiya sa flood control.
Inimbitahan sila bilang mga resource person sa pagdinig dahil pinamunuan ni Co ang House Committee on Appropriations at si Poe ang nanguna sa Senate Committee on Finance.
Sa pagdinig ng Senado noong Lunes, muling idineklara ni Navotas City Rep. Toby Tiangco na nagmungkahi si Co ng bilyun-bilyong pisong insertions sa 2025 national budget.
Si Co na ngayon ay nasa Estados Unidos para sa “medical treatment” ay itinanggi ang mga paratang.
Samantala, iniugnay ni House Deputy Speaker Ronaldo Puno ng Antipolo si Poe sa pinal na draft ng 2025 spending plan.
Ngunit humingi ng paumanhin si Puno sa dating senador, at sinabing nalaman niyang hindi siya pinayagang lumahok sa mga deliberasyon ng bicameral conference committee.
Dagdag pa ni Puno, dapat magpatuloy ang proseso ng “determining accountability” sa usapin kahit sa Senado.
“I don’t think that has been completely resolved yet,” sagot niya sa mga katanungan sa mga pagbabago sa pagitan ng mga panukalang batas sa badyet na inaprubahan ng alinmang kapulungan ng Kongreso at ang ipinadala sa Palasyo para pirmahan ng Pangulo. RNT/MND
