MANILA, Philippines – Ipinanawagan ni Cavite 4th District Rep. Francisco “Kiko” Barzaga, na dati’y masugid na tagasuporta ni Pangulong Ferdinand “Bongbong” Marcos Jr. noong 2022 elections, ang kanyang impeachment.
Sa isang Facebook post nitong Setyembre 30, sinabi ni Barzaga: “Congressman Kiko Barzaga is calling for the impeachment of President Marcos due to his inability to bring justice for the hundreds of billions stolen from the DPWH Flood Control Funds.”
Umabot na sa higit 64,000 reactions at 10,500 shares ang kanyang post na may hashtag #PhilippinesVsMarcos.
Kilala si Barzaga, 27, sa kanyang kakaibang estilo at tinatawag ang sarili bilang “congressmeow.”
Madalas niyang gamitin ang social media para sukatin ang damdamin ng publiko.
Kamakailan, itinanghal niya ang sarili bilang anti-corruption crusader, ngunit ang kanyang kilos gaya ng pagva-vlog sa plenaryo ay ikinairita umano ng ilang beteranong mambabatas.
Sa loob ng mahigit tatlong taon ni Marcos bilang pangulo, wala pang naihahaing impeachment case laban sa kanya.
Sa isa pang Facebook post, inakusahan ni Barzaga si Marcos na nasa likod ng rekomendasyon para siya’y matanggal sa Armed Forces of the Philippines (AFP) reserve force.
“Marcos can remove me from the Philippine Reserve Forces, but he will never remove my desire to fight for the Filipino People!” ani Barzaga.
Kinumpirma naman ng Philippine Army na nirekomenda ang pagtanggal kay Barzaga dahil sa “grave offense of misconduct,” ayon kay Col. Louie Dema-ala.
“He is recommended for delisting after a thorough investigation. The recommendation is forwarded through the proper channel for final action,” dagdag niya. RNT
