MANILA, Philippines – Naghain ng disbarment complaint ang kampo ni Acting Davao City Mayor Sebastian Duterte sa Korte Suprema upang matanggalan ng lisensya sina Justice Boying Remulla at Defense Secretary Gibo Teodoro.
Sa pamamagitan ni Atty. Estrelito Torreon, legal counsel ni Mayor Baste, sinabi na ang reklamo ay dahil sa mga naging papel ng nabanggit na matataas na opisyal sa umano’y illegal na pag-aresto at extra-judicial rendition sa kanyang ama na si dating pangulong Rodrigo Duterte.
Pinadidisbar din sina DOJ Usec. Nicholas Felix Ty at Prosecutor General Richard Fadullon.
Sinabi ni Atty. Torreon na ito ay may kaugnayan sa kidnapping at expulsion ng dating pangulo sa The Hague, Netherlands.
“In the light of the fact that the family has decided to file a disbarment complaint againts these lawyers who happened to be high officials of the land, acting Mayor Duterte decided to file himself in behalf of his family,” ani Atty. Torreon.
Si Remulla umano ang nakipag-ugnayan sa ICC at Interpol para illegal na maipatupad ang warrant of arrest laban sa matandang Duterte.
Mayroon din daw itong direktang kontrol at superbisyon kay Fadullon na siyang nagpahintulot para mangyari ang pag-aresto.
Ang AFP mayroon din umanong partisipasyon sa pagdakip kung saan ang mga opensa ay nangyari daw sa Villamor Air Base-Ang AFP ay nasa ilalim ng superbisyon ni Teodoro bilang kalihim ng Department of National Defense.
Ayon sa petisyuner, nilabag ng mga respondent ang Konstitusyon at ang Code of Professional Responsibility and Accountability dahil sa kanilang “unlawful, dishonest and deceitful act”. Jocelyn Tabangcura-Domenden
