MANILA, Philippines – Sa paniniwalang dagdag-pasanin sa mga mahihirap ang mataas na presyo ng mga produktong pang-menstruation, isang panukala ang inihain sa Kamara na naglalayong gawing libre ang mga menstrual hygiene product sa lahat ng pampublikong paaralan at health center sa buong bansa.
Tinawag ni Akbayan Party-list Rep. Dadah Kiram Ismula na “period poverty” ang isyung tinutugunan ng kanyang inihaing House Bill No. 5179 o Free Period Products Bill, na layong matiyak na may sapat na produkto ang mga kababaihan sa panahon ng kanilang buwanang dalaw.
“The cost of pads and tampons has been a silent barrier, forcing girls to miss classes and women to skip work. Ang pagbibigay natin ng libreng menstrual products ay hindi lang usapin ng kalusugan, kundi katarungan din,” pahayag ni Ismula.
Sa ilalim ng panukala, bibigyang mandato ang Department of Health (DOH), Department of Education (DepEd), State Universities and Colleges (SUCs), at Local Government Units (LGUs) na bumili ng mga menstrual product — kabilang ang sanitary napkins, tampons, reusable pads, at menstrual cups — upang ipamahagi sa lahat ng public school, learning institution, at community-based health facility gaya ng mga barangay health center.
“The Free Period Products Bill is a pro-poor and pro-women measure. Panahon na para gawing libre at accessible ang menstrual products para sa lahat,” dagdag pa ni Ismula. Gail Mendoza
