MANILA, Philippines – Niyanig ng magnitude 6.0 na lindol ang karagatan ng Cagwait, Surigao del Sur nitong Sabado ng gabi, ayon sa Philippine Institute of Volcanology and Seismology (PHIVOLCS).
Unang naitala sa magnitude 6.2, naganap ang lindol bandang 10:32 p.m. na may sentrong 28 kilometro hilagang-silangan ng Cagwait at lalim na 24 kilometro.
Itinala ang Intensity IV sa Cagwait at Carmen sa Surigao del Sur, Cagayan de Oro, Davao, at Butuan; Intensity III sa ilang bahagi ng Southern Leyte, Bukidnon, at Davao Oriental; at Intensity II sa Leyte, Samar, at Surigao City.
Ayon sa PHIVOLCS, inaasahan ang mga aftershock at posibleng pinsala matapos ang pagyanig. Nangyari ito isang araw matapos ang magnitude 7.4 na “doublet” earthquake sa Manay, Davao Oriental.
Ayon sa Office of Civil Defense, hindi bababa sa walong katao ang nasawi dahil sa naunang mga lindol sa Davao Oriental. Santi Celario
