MANILA, Philippines – Tiniyak ni Vice President Sara Duterte na inaayos na ng kanilang pamilya ang pagbiyahe patungong The Hague upang dalawin si dating Pangulong Rodrigo Duterte, kasunod ng desisyon ng International Criminal Court (ICC) na tanggihan ang apela nito para sa pansamantalang paglaya.
“Yes, we already expect that,” ani Duterte sa panayam ng mga mamamahayag sa Zamboanga City nitong Miyerkoles, Oktubre 15 nang tanungin kung inaasahan nilang hindi makakauwi ang ama para sa Pasko.
Bagama’t hindi pa raw sila nagkakausap tungkol sa usapin, sinabi ng Pangalawang Pangulo na araw-araw nakikipag-ugnayan ang dating Pangulo sa kanyang abogado kaya’t “alam na niyang mangyayari iyon.”
Dagdag pa niya, inaayos na ang iskedyul ng pagbisita ng mga miyembro ng pamilya sa detention center ng ICC.
Sa 23-pahinang ruling na inilabas noong Oktubre 10, sinabi ng Pre-Trial Chamber (PTC) 1 ng ICC na nananatiling kailangan ang pagkakakulong ng dating Pangulo batay sa tatlong dahilan sa ilalim ng Rome Statute: upang matiyak ang kanyang pagdalo sa paglilitis, maiwasan ang paghadlang sa imbestigasyon o proseso, at mapigilan ang posibleng pag-commit ng karagdagang krimen.
Tinanong din si VP Sara tungkol sa mga ulat na posibleng ma-disqualify si ICC Prosecutor Karim Khan dahil umano sa conflict of interest.
“It doesn’t matter who the prosecutor is because their task will be the same… What’s important is the preparation of the defense team,” aniya.
Para naman kay Kristina Conti, ICC Assistant to Counsel, walang sapat na basehan ang diskwalipikasyon ni Khan.
“As disclosed, he had assisted a group of victims… We see no significant or fundamental conflict of interest,” ani Conti.
Si dating Pangulong Duterte ay nasa kustodiya ng ICC mula pa noong Marso 11 at nahaharap sa tatlong bilang ng murder at attempted murder bilang crimes against humanity kaugnay ng libu-libong napatay sa kampanya kontra droga noong siya ay alkalde ng Davao at Pangulo ng bansa.
Batay sa datos ng gobyerno, mahigit 6,000 ang nasawi sa “Oplan Tokhang,” ngunit tinatayang nasa 30,000 ang bilang ayon sa mga human rights groups. RNT/JGC
