MANILA, Philippines – Nagkasundo ang Department of Agriculture (DA) at mga lokal na stakeholder sa industriya ng baboy na magtakda ng minimum farmgate price na P210 kada kilo para sa live hogs upang matulungan ang mga prodyuser na makabawi sa mga pagkalugi dulot ng African swine fever (ASF).
“Nagkasundo ang DA at saka mga local hog producers na mag-establish ng minimum farmgate price of PHP210 per kilo for live hogs para tulungan yung mga magba-baboy na maka-recover sa kanilang losses,” ayon kay DA spokesperson Arnel de Mesa.
Bumagsak na ang farmgate prices sa PHP150–180 kada kilo, na mas mababa o halos katumbas ng average production cost na PHP170–180 kada kilo. Sa kabila nito, mataas pa rin ang retail prices, kung saan ang liempo ay binebenta ng humigit-kumulang PHP400 kada kilo, ayon kay Agriculture Secretary Francisco Tiu Laurel Jr.
Layunin ng DA na ipatupad ang minimum farmgate price bago matapos ang taon. Binanggit din ang sobrang pag-import ng baboy dahil sa mas mababang taripa sa ilalim ng Executive Order 62, mula 40% pababa sa 25%. Nanawagan ang mga stakeholder na ibalik ang 40% tariffs upang mas mapabilis ang recovery ng industriya.
Plano rin ng DA na muling ipatupad ang maximum suggested retail price (MSRP) para sa baboy upang maprotektahan ang mga konsyumer, ngunit hindi pa napagkasunduan ang bagong MSRP. Dati, itinakda ang liempo sa PHP380/kg, kasim at pigue sa PHP350/kg, at sabit-ulo sa PHP300/kg. Santi Celario
