MANILA, Philippines – Gagamit ng body-worn cameras ang mga pulis na itatalaga sa tatlong araw na rally ng Iglesia ni Cristo.
Sa pahayag ng Philippine National Police (PNP), layon nitong masiguro ang full transparency at accountability sa pagsasagawa ng crowd management ng ahensya.
“The use of body-worn cameras ensures that every interaction is documented,” sinabi ni PNP acting chief Police Lieutenant General Jose Melencio Nartatez Jr.
“Ito ay para maiwasan ang abuso at para masiguro na ang bawat galaw namin ay may pananagutan. This strengthens public trust that the PNP is committed to lawful and respectful policing,” dagdag pa nito.
Para kay Nartatez, ang mga recording mula sa body-worn cameras ay magsisilbing ebidensya sa mga kaso ng misconduct, provocation, o operational lapses na maaaring lumitaw.
“Kapag may reklamo, agad naming rerepasuhin ang footage. Ang body-cam ang magsisilbing malinaw na ebidensya kung maayos at patas ang aming naging operasyon. Sa panahon ngayon na mabilis kumalat ang maling impormasyon, the footage will help us correct false claims and present what truly happened,” aniya.
Ayon sa PNP, nakatakdang magpulong sina Nartatez, Interior and Local Government Secretary Jonvic Remulla at NCRPO chief Police Major General Anthony Aberin kasama si Pangulong Ferdinand Marcos Jr. sa Malakanyang. RNT/JGC
