MANILA, Philippines – Tinanggihan ni Navotas City lone district representative Toby Tiangco ang apela ng legal counsel ni dating Rep. Zaldy Co na payagan ang itong makapagpiyansa o sumailalim sa house arrest.
“Hindi tayo papayag na house arrest o bail. No bail ang recommendation ng Ombudsman para sa malversation at graft charges,” giit ni Tiangco.
“Kapag simpleng barya ang kinuha ng isang tao, diretso kulong. Pero kapag bilyon-bilyon ang pinag-uusapan, biglang mag-rerequest ng bail o house arrest? No way,” aniya.
Nag-react si Tiangco sa apela ng abogado ni Co na si Ruy Rondain kamakailan para sa kaligtasan ng kanyang kliyente. Si Co ay nagtatago sa ibang bansa.
Nagbitiw si Co bilang kinatawan ng Ako Bicol Party-list sa kasalukuyang 20th Congress noong Setyembre 29. Ilang buwan bago ito, iniulat niyang umalis ng bansa upang magpagamot para sa isang sakit sa puso.
Noong mga panahong ito, na-link ang kanyang pangalan sa mga insertion ng badyet at nang maglaon, ang flood control projects corruption scandal. Si Tiangco ang naging pinaka-vocal sa mga tuntunin na personal na sagutin ni Co ang mga alegasyon, lalo na sa nakaraang tungkulin ng huli bilang chairman ng makapangyarihang Committee on Appropriations.
Sinabi ni Tiangco na napakalinaw ng batas na ang malversation ng pampublikong pondo at graft ay kabilang sa mga pinakamatinding krimen laban sa mamamayang Pilipino.
“Hindi ito sakit ng ulo na basta puwedeng ‘magpahinga sa bahay.’ Kung ordinaryong mamamayan walang lusot, bakit sa kay Zaldy Co may special request?” tanong niya.
Aniya kay Rondain, ang hustisya “cannot be twisted to favor the powerful”.
“Kung may tiwala silang malinis ang kanilang kliyente, harapin niya ang kaso sa loob ng kulungan, hindi sa sala ng bahay. Wag nang dagdagan pa ang nag aalab na galit ng taumbayan,” ani pa niya. RNT/MND
