MANILA, Philippines – Inakusahan ni Rep. Leandro Legarda Leviste ang Department of Public Works and Highways (DPWH) na itinatago ang mga proponent ng ₱721.8 billion na insertions sa 2025 at ₱496.9 billion sa 2026 na budget.
Ayon kay Leviste, hindi maaring mag-angkin ng transparency ang DPWH habang itinatago ang mga tao sa likod ng mga proyekto, kabilang ang mga mambabatas, miyembro ng gabinete, at posibleng kontratista.
“Ang DPWH ay may database ng mga proponents sa NEP, na dapat nilang ilabas kung sila ay tunay na para sa transparency. Mayroong P721.83 Billion insertions para sa 2025 at P496.97 Billion insertions para sa 2026, at hindi ko sa mabuting budhi panoorin ang DPWH claim na para sa transparency nang hindi itinuturo ito,” ani Leviste.
“Sa susunod na presscon ng DPWH, maaari nilang aminin na may itinatago sila at hanggang ngayon ay kinasuhan ng insertions ang NEP,” dagdag pa ng mambabatas.
Binanggit ni Leviste ang tinatawag na “pre-ordering,” kung saan ang mga proyekto ay nakatalaga na sa NEP bago pa man dumaan sa deliberasyon ng Kongreso.
Ipinakita niya ang dokumento mula kay dating Undersecretary Maria Catalina Cabral na may listahan ng mga pre-allocated projects, kabilang ang ₱22 billion na umano’y “pre-ordered” ni CWS party-list Rep. Edwin Gardiola.
Hinimok ni Leviste ang DPWH na ilabas ang buong listahan ng mga proponent, at binigyang-diin na maaaring limitado ang imbestigasyon ng Independent Commission for Infrastructure (ICI) at Ombudsman kung walang kompletong access sa datos.
Aniya, kahit nabawasan na ang presyo ng proyekto para sa 2026 sa ilalim ni Secretary Vince Dizon, nananatiling arbitraryo ang pagpili ng mga proyekto na prone sa korapsyon.
