MANILA, Philippines – Handa na ang Philippine National Police (PNP) na i-secure ang malawakang anti-corruption protests sa Luneta Park sa Manila at People Power Monument sa Quezon City sa Nobyembre 30.
Sa isang pahayag, sinabi ni PNP acting chief Police Lieutenant General Jose Melencio Nartatez Jr. na nakatakdang magtalaga ang organisasyon ng mas malakas na security contingent para sa mga rally, kung saan 15,000 pulis ang ipapakalat.
“The deployment is not about intimidation, it’s about readiness. We expect large number of crowds in multiple activity areas so our personnel on the ground should be quick in responding to emergencies and even any violation of the law,” saad ni Nartatez.
“Let me be clear that law enforcement presence does not mean aggressive action. The order for maximum tolerance still remains,” dagdag niya.
Ito ay upang matiyak na ang lahat ng mga aksyong masa ay mananatiling mapayapa, maayos, at walang mga pagtatangkang mag-udyok ng karahasan o guluhin ang kaligtasan ng publiko, ayon sa PNP.
Kasama sa deployment ang nasa 8,800 police personnel mula sa National Capital Region Police Office (NCRPO) at 6,200 police personnel mula sa Special Action Force (SAF) at regional police offices.
Ang mga pulis ay lulugar sa Luneta Park, People Power Monument, EDSA Shrine, kapaligiran ng Malacañang, House of Representatives, Senate, at opisina ng Independent Commission for Infrastructure.
Sa ngayon, walang pagbabanta ang nakita ngunit ang mga proactive na hakbang ay nananatiling kinakailangan, ayon kay Nartatez.
Naghahanda na rin ang PNP para sa posibleng infiltration attempt ng mga grupong naglalayong magdulot ng kaguluhan, katulad ng insidente ng September 21 rally sa Maynila.
“May ganitong considerations lagi sa malalaking gatherings. Naka-focus ang intelligence monitoring natin sa potential agitators. Rest assured, we are coordinating closely with other agencies to prevent any attempt to hijack the peaceful intent of the rally,” ayon kay Nartatez.
Gagamitin ang mga body-worn camera sa lahat ng police engagement at ang mga human rights affairs officers ay naroroon sa mga aktibidad para sa transparency at accountability, ayon sa PNP.
“Gusto naming iparating sa publiko na the PNP is here to protect, hindi para manghadlang. Ang deployment po ay para masiguro ang kaligtasan ng lahat, protesters man o hindi,” aniya.
“We fully respect the people’s right to peaceful assembly, and our commitment is to provide a safe, orderly, and secure environment for everyone on November 30,” dagdag niya. RNT/MND
