CAVITE, Philippines – Inaresto ng mga pulis mula sa Magallanes PNP Station at Lubang, Occidental Mindoro, ang isang itinuturing na Regional Level Most Wanted Person, sa Magallanes, Cavite.
Nagkaroon ng operasyon bandang 2:30 ng hapon sa Jovillar St., Barangay Poblacion 4, gamit ang warrant of arrest na inisyu ni Judge Eduardo Ramon Roldan Reyes ng RTC Branch 15, Maynila. Ang kaso ay may kaugnayan sa paglabag sa Migrant Workers and Overseas Filipinos Act of 1995 (RA 8042, na inamyendahan ng RA 10022). Walang inirekomendang piyansa para sa kasong ito (Criminal Case No. R-MNL-24-02330-CR), na inisyu noong Abril 25, 2024.
Ayon sa pulisya, may iba pang warrant si Cheryl, kabilang ang tatlong kaso ng estafa (Criminal Case Nos. M-MNL-24-03744-CR, M-MNL-24-03745-CR, M-MNL-24-03746-CR) na may kabuuang piyansang ₱18,000, na inisyu ni Judge Joseph Patrick Byron Magpantay Bathan ng MTC Branch 25, Maynila.
Bukod dito, may isa pang warrant laban sa kanya para sa paglabag sa RA 8042 at RA 10175 (Cybercrime Prevention Act), sa ilalim ng Criminal Case No. R-MND-22-01086-CR, na inisyu noong Hunyo 8, 2023, ni Judge Aileen N. Saquing-Agacita ng RTC Branch 213, Mandaluyong City, na may piyansang ₱120,000.
Iniuugnay din ng pulisya si Cheryl sa ASANO Criminal Group, na diumano’y sangkot sa mga ilegal na aktibidad, ngunit wala pang karagdagang detalye ang ibinigay.
Kasalukuyang nasa kustodiya ng Magallanes Police Station si Cheryl upang harapin ang mga kasong isinampa laban sa kanya. MARGIE BAUTISTA
