MANILA, Philippines – Mas kakaunti na ang Pilipinong nag-aasawa dahil sa lumalalang economic pressures, nagbabagong prayoridad, at pagbabago sa pananaw sa pamilya, ayon sa Commission on Population and Development (CPD) nitong Martes.
Ayon sa Philippine Statistics Authority, bumaba ng 10.2 porsiyento ang rehistradong kasalan noong 2024.
Mas inuuna ng maraming Pilipino ang katatagang pinansyal at personal na layunin bago pumasok sa pormal na pagsasama. Tumataas ang cohabitation bilang praktikal na alternatibo, kung saan may mga magkasintahan na namumuhay na magkasama pagkatapos ng pagbubuntis o iwas sa kasal dahil sa mataas na gastos na nakikita.
Nakakaapekto rin sa kabataan ang negatibong kwento sa social media tungkol sa mga problema sa kasal.
Dumarami ang mga ipinapanganak sa labas ng kasal, higit 840,000, kumpara sa 640,000 sa loob ng kasal.
Gayunpaman, nananatiling popular ang Pebrero, Hunyo, at Disyembre para sa kasal dahil sa kultura at tradisyon.
Binigyang-diin ng CPD ang pangangalaga sa kababaihan at bata sa cohabitation at ang epekto ng mas kaunting kasalan sa demograpiya, tulad ng delayed childbearing, mababang fertility, at mabagal na paglago ng populasyon. Hinikayat ang mga Pilipino na maging maalam sa relasyon at family planning. RNT
