TINIYAK ng Philippine Health Insurance Corporation (PHILHEALTH) na patuloy nitong sinusuportahan ang mga Persons Living with HIV (PLHIV) sa pamamagitan ng mas pinalawak na Outpatient HIV/AIDS Treatment (OHAT) Package. Layunin nitong magbigay nang mas malawak na saklaw ng serbisyong medikal at tulong pinansyal sa mga nangangailangan.
Bilang bahagi ng “Yaman ng Kalusugan Program” (YAKAP), pinaiigting din ng PHILHEALTH ang edukasyon at kamalayan hinggil sa HIV, kabilang ang kahalagahan ng maagang pagpapasuri at regular na pagpapagamot.
Tiniyak ng ahensya na lahat ng serbisyong ito ay isinasagawa nang may lubos na kumpidensyal na pangangalaga.
Kasabay sa obserbasyon ng “World AIDS Day” nitong Disyembre 1, 2025, na may temang “Overcoming disruption, transforming the AIDS response,” muling iginiit ng Department of Health (DOH) ang pangangailangan ng pagdedeklara ng national public health emergency, matapos makapagtala ng mahigit 5,500 na bagong kaso ng HIV mula lamang Hulyo 2025 hanggang Setyembre 2025.
Ayon sa DOH, patuloy na tumataas ang bilang ng mga tinatamaan, kabilang na ang mga nasa mas batang edad.
Sinabi ni Dr. Edwin Mercado, PHILHEALTH acting president at chief executive officer, hinikayat niya ang publiko na huwag mag- atubiling magpakonsulta.
Aniya, wala daw dapat ipag- alala ang mga miyembro dahil narito ang PHILHEALTH upang tugunan ang kanilang pangangailangang medikal.
Hinikayat niya ang publiko na huwag matakot o mahiyang magpagamot at tiniyak niyang protektado ang kanilang personal na impormasyon.
Mula sa naunang Php30,000, itinaas na sa Php58,500 kada taon ang benepisyo ng pinalakas na OHAT Package o katumbas ng 95 porsyento na pagtaas. Sinasaklaw nito ang:
– Antiretroviral Therapy (ART) para sa lahat ng may kumpirmadong HIV test mula sa DOH- certified facilities;
– Mga laboratory test, clinical evaluation, at iba pang kinakailangang serbisyo para sa komprehensibong pangangalaga; at
– Pagsubaybay ng mga medical specialist upang matiyak ang tamang gamutan.
Ang pagpapalawak ng package ay alinsunod sa direktiba ni President Ferdinand “BBM” Marcos, Jr. na palakasin ang benepisyong pangkalusugan, lalo na para sa mga pasyenteng nangangailangan ng patuloy na gamutan.
