MANILA, Philippines – Humiling si dating senador Ramon “Bong” Revilla Jr. sa Department of Justice (DOJ) ng karagdagang oras para sagutin ang mga kasong kriminal na isinampa laban sa kanya kaugnay ng umano’y anomalya sa mga flood control project sa Bulacan.
Kinumpirma ni Prosecutor General Richard Anthony Fadullon na kasama sa reklamo sina Revilla at dating kongresista Zaldy Co bilang mga “proponent” ng nasabing proyekto.
“There’s a request for an extension to file the counter-affidavit. So, the panel will act accordingly… we just have to see and await the results of the preliminary investigation,” sabi ni Fadullon.
Paliwanag niya, noong una, mga opisyal lang ng Department of Public Works and Highways (DPWH) ang kinasuhan. “Eventually, there were pieces of evidence submitted by the National Bureau of Investigation, and this time included proponents,” dagdag niya.
Ayon naman kay DOJ spokesperson Polo Martinez, sina Revilla at Co ay idinagdag na respondents sa mga kasong may kinalaman sa SYMS Construction and Trading. Kasama rin sila sa mga reklamong isinampa ng NBI tungkol sa diumano’y ghost projects ng Wawao Builders at Topnotch Catalyst Builders.
Sinabi rin niya na ang mga kaso laban sa Wawao at Topnotch ay nasa “initial evaluation” pa lamang bago pa umabot sa preliminary investigation.
Samantala, inaasahan ni Fadullon na mailalabas ang resolusyon para sa tatlong naunang isinumiteng kaso bago mag-Disyembre 15. RNT/MND
