NEW YORK – Nagkasundo ang Netflix at Warner Bros. Discovery sa isang $72 bilyong kasunduan na maaaring magbago sa industriya ng pelikula at streaming.
Kasama sa Warner Bros. ang mga kilalang pelikula tulad ng Harry Potter, DC Studios, at ang streaming service na HBO Max.
Kung aprubahan ng mga regulators, pagsasamahin nito ang dalawa sa pinakamalaking kumpanya sa telebisyon at pelikula sa mundo.
Ayon kay David Zaslav, CEO ng Warner Bros. Discovery, sa pamamagitan ng pagsasanib sa Netflix, mas marami pang tao sa buong mundo ang makakapanood ng mga sikat at makabuluhang kuwento.
Ang deal ay nagkakahalaga ng $27.75 kada share ng Warner, o kabuuang $82.7 bilyon kasama ang utang.
Inaasahang matatapos ang transaksyon sa loob ng 12 hanggang 18 buwan, matapos matapos ng Warner ang hiwalay na operasyon ng cable business nito. Hindi kasama sa deal ang CNN at Discovery.
Maaaring magkaroon ng matinding antitrust review dahil sa posibleng epekto sa paggawa ng pelikula at streaming subscriptions. Ayon kay Mike Proulx ng Forrester, magiging pinakamalaking streaming service ang Netflix kung pagsasamahin sa HBO Max.
Isa sa mga tanong ay kung mananatiling hiwalay ang Netflix at HBO Max bilang streaming services o magiging isang mega streaming service. Posibleng magdulot ito ng isang subscription bill para sa parehong serbisyo o promo bundles para sa mga manonood.
Sinabi naman ng Netflix na makakadagdag ang HBO at HBO Max sa kanilang mga miyembro ng mas maraming high-quality titles at mas maayos na plano para sa mga konsyumer.
Ngunit may mga kritiko na nagsabing maaaring maging mas malaki at makapangyarihang kumpanya ang pagsasanib, na maaaring magdulot ng pagkawala ng trabaho at mas kaunting iba’t ibang content.
Pinangako rin ng Netflix na ipagpapatuloy ang theatrical releases ng Warner films, kahit mas nakatuon ang Netflix sa online platform.
Nagpaalala ang mga Cinema United, Writers Guild of America, at Producers Guild of America na maaaring masama ang epekto nito sa mga sinehan at sa mga taong nagtatrabaho sa industriya ng pelikula.
Ang Warner Bros., na may 102 taong kasaysayan, ay isa sa “big five” studios sa Hollywood. Kung maaprubahan ang benta, ang natitirang legacy studios ay Disney, Paramount, Sony Pictures, at Universal.
Ang deal ay dumating matapos ang isang monthslong bidding war para sa Warner, kung saan interesado rin ang Comcast at Paramount. Ngunit sa huli, pinili ng Warner ang alok ng Netflix.
Ngunit ayon sa mga eksperto, mahirap ang daraanan ng deal sa regulatory approvals, lalo na sa isyu ng kontrol sa streaming at production.
Kasama sa pagbili ng Netflix ang HBO, HBO Max, Warner Bros. Television, Warner Bros. Motion Picture Group, at DC Studios. Samantala, ang cable networks tulad ng CNN, Discovery, at TNT Sports ay magiging hiwalay na kumpanya na tatawaging Discovery Global, na magiging publicly traded sa ikatlong quarter ng 2026. RNT/MND
