MANILA, Philippines – Pinalawak ng Department of Agriculture (DA) sa Eastern Visayas ang kanilang pangunahing food security program na “Benteng Bigas Meron Na!” sa mga lalawigan ng Samar at Northern Samar, upang mas mapalapit ang abot-kayang bigas sa mga pamilyang mahihirap.
Sa Samar, ginanap ang provincial launch noong Disyembre 4 sa Jiabong, habang sa Northern Samar ay noong Disyembre 8 sa Catarman. Sa parehong okasyon, 400 bags ng locally sourced rice ang ipinamahagi sa 2,000 beneficiaries, bawat isa ay maaaring bumili ng 10 kilo ng bigas sa halagang P20 bawat kilo.
Ang mga unang benepisyaryo ay mula sa Pantawid Pamilyang Pilipino Program (4Ps), senior citizens, solo parents, persons with disabilities, at indigenous communities.
Ayon kay Francis Rosaroso, chief ng Agribusiness and Marketing Assistance Division (AMAD) ng DA-8, ang programa ay katuparan ng pangako ng administrasyon na magkaroon ng abundant, abot-kaya, at magandang kalidad na bigas para sa lahat.
Layunin ng DA na ipatupad ang P20-per-kilogram rice program sa lahat ng lalawigan sa rehiyon.
Bukod sa Samar at Northern Samar, aktibo na rin ang programa sa Leyte at Eastern Samar, at nakatakdang ilunsad sa Biliran at Southern Leyte.
Maaaring makabili ng subsidized rice ang mga benepisyaryo sa mga National Food Authority (NFA) branches, para sa walk-in clients.
Ang Benteng Bigas Meron Na! ay flagship program ng administrasyong Marcos na naglalayong gawing abot-kaya ang bigas para sa low-income Filipinos. Ang bigas ay galing sa NFA, kadalasan ay mula sa lokal na magsasaka, kaya sinusuportahan nito ang domestic agriculture at pinapantay ang presyo ng pangunahing pagkain.
Layunin ng programa na bawasan ang epekto ng tumataas na presyo ng pagkain, habang tinitiyak ang matatag na kita ng mga magsasaka sa pamamagitan ng fair farm-gate prices para sa palay, na nakakatulong sa parehong food security at welfare ng mga magsasaka.
Ipinapatupad ang programa sa pamamagitan ng mga public markets, retail sites, at Kadiwa ng Pangulo stores, na pinamamahalaan ng DA, NFA, lokal na pamahalaan, at mga katuwang na organisasyon. Bahagi ito ng mas malawak na Masaganang Bagong Pilipinas na layong palakasin ang food security, sustainability ng agrikultura, at social welfare sa buong bansa. RNT/MND
