MANILA, Philippines – Naaresto ng mga pulis ang isang lalaki matapos nitong magbenta ng shabu sa isang undercover officer sa Taguig nitong Martes, Disyembre 9.
Ang suspek, na kilala bilang Ferdie, 40 taong gulang, ay nahuli sa buy-bust operation sa Padilla Compound, Barangay Lower Bicutan, na isinagawa ng Taguig Police.
Narekober mula sa kanya ang anim na plastic sachets ng shabu na may timbang na 28.3 gramo at tinatayang P192,440 ang halaga. Nakuha rin ang genuine P500 bill na ginamit sa buy-bust at anim na P1,000 boodle money.
Dinala si Ferdie sa Station Drug Enforcement Unit ng Taguig Police para sa dokumentasyon at haharap sa reklamo para sa paglabag sa Sections 5 (sale) at 11 (possession) ng Republic Act 9165 o Comprehensive Dangerous Drugs Act of 2002.
Pinuri ni Brig. Gen. Randy Arceo, district director ng Southern Police District, ang mga pulis sa kanilang operasyon at sinabing, “Ang SPD ay patuloy na determinado na suportahan ang lahat ng legal na aksyon para protektahan ang ating komunidad. Bawat matagumpay na operasyon ay hakbang patungo sa mas ligtas na kalsada at mas maayos na kapaligiran.” RNT/MND
