WASHINGTON, United States – Pinaghahandaan ni U.S. President Donald Trump ang mas pinaigting na immigration crackdown sa 2026, na susuportahan ng bilyon-bilyong dolyar na pondo, kabilang ang mas maraming raid sa mga lugar ng trabaho, kahit na dumarami ang tumututol bago ang midterm elections sa susunod na taon.
Naipadala na ng administrasyon ni Trump ang mas maraming immigration agents sa malalaking lungsod sa U.S., kung saan nagsagawa sila ng mga operasyon sa mga komunidad at nagkaroon ng tensyon sa mga residente. Bagama’t may ilang raid na isinagawa sa mga negosyo ngayong taon, iniiwasan muna ang mga sakahan at pabrika na mahalaga sa ekonomiya at kilalang may mga undocumented immigrants.
Ayon sa ulat, makakatanggap ang ICE at Border Patrol ng $170 bilyon na karagdagang pondo hanggang Setyembre 2029, bukod pa sa kasalukuyan nilang $19 bilyong taunang badyet, matapos maipasa ng Republican-controlled Congress ang malaking spending package noong Hulyo.
Plano ng administrasyon na mag-hire ng libu-libong bagong agents, magtayo ng mas maraming detention centers, dumampot ng mas maraming undocumented immigrants sa mga lokal na kulungan, at makipagtulungan sa mga pribadong kumpanya para masubaybayan ang mga taong walang legal na status.
Gayunman, lumalakas ang political backlash laban sa mga hakbang na ito. Sa Miami, na may malaking populasyon ng immigrants, nahalal ang unang Democratic mayor sa halos 30 taon, na ayon sa mayor-elect ay bahagyang reaksiyon sa immigration policies ni Trump. Ipinapakita rin ng mga survey na dumarami ang mga botanteng nag-aalala sa agresibong taktika ng pamahalaan.
Bumaba rin ang approval rating ni Trump sa immigration policy mula 50% noong Marso sa 41% noong kalagitnaan ng Disyembre, matapos magsimula ang malawakang operasyon sa mga lungsod. Maraming mamamayan ang nababahala sa agresibong kilos ng mga federal agents, kabilang ang paggamit ng tear gas at ang pagkaka-detain kahit ng ilang U.S. citizens.
Bukod dito, tinanggal ng administrasyon ang pansamantalang legal status ng daan-libong Haitian, Venezuelan, at Afghan immigrants, na nagpalawak sa bilang ng maaaring ma-deport. Layunin ni Trump na mag-deport ng 1 milyong immigrants bawat taon, ngunit malabong maabot ito ngayong taon. Sa ngayon, humigit-kumulang 622,000 na ang nadeport mula nang maupo siya noong Enero.
Ayon kay White House border czar Tom Homan, tutuloy at lalo pang lalawak ang mga operasyon, kabilang ang mas maraming raid sa mga lugar ng trabaho. Inaasahang lalaki pa nang husto ang bilang ng mga aresto kapag nadagdagan ang mga tauhan at pasilidad ng ICE.
Nagbabala naman ang ilang eksperto na ang pag-target sa mga employer ay maaaring makasama sa ekonomiya, magdulot ng mas mataas na gastos sa sahod, at makaapekto sa laban ni Trump kontra inflation, na mahalagang isyu sa nalalapit na halalan.
Ipinapakita rin ng datos na mas maraming inaaresto ngayon ang walang kasong kriminal maliban sa paglabag sa immigration laws kumpara sa mga nakaraang administrasyon. Tinatayang 41% ng mga inaresto ng ICE hanggang huling bahagi ng Nobyembre ay walang ibang criminal record.
Sa kabuuan, habang ipinipilit ng administrasyong Trump ang pinakamalaking deportation campaign sa kasaysayan ng U.S., patuloy namang lumalakas ang pagtutol ng publiko, negosyo, at ilang botante sa paraan ng pagpapatupad nito. RNT/MND
