MANILA, Philippines – Target ng Office of the Ombudsman ang civil forfeiture case laban kay dating House Speaker Martin Romualdez, ayon sa hepe ng Department of the Interior and Local Government nitong Lunes, Disyembre 22.
Ang civil forfeiture case ay magbibigay-daan sa pamahalaan na kunin ang asset ng isang indibidwal nang hindi kinakasuhan ang isang tao sa krimen.
Ayon kay DILG Secretary Jonvic Remulla, kapatid ni Ombudsman Jesus Crispin Remulla, anti-graft office ay “determined to file gross criminal neglect or gross neglect on his part for civil forfeiture of all his assets.”
“If we cannot get him criminally, then we will get his assets,” sinabi pa ng kalihim.
Noong Disyembre 18, sinabi ng Department of Public Works and Highways na inirekomenda nila ang criminal at administrative charges laban sa 87 indibidwal kabilang si Leyte 1st District Rep. Romualdez, kaugnay sa flood control corruption scandal.
Sinabi naman ng kampo ni Romualdez na ang rekomendasyon ng DPWH na maghain ng reklamo laban sa dating speaker ay hindi isang determination of guilt.
Samantala, umapela naman si Remulla sa publiko na husgahan ng publiko ang kanyang kapatid sa kanyang trabaho bilang Ombudsman at hindi “for what he has yet to show.”
Mayroon kasing mga pangamba na maaaring makaapekto ang background ni Ombudsman Remulla bilang isang politiko sa pagtugis sa mga personalidad na nasa likod ng flood control scandal dahil marami sa mga ito ay public officials.
Sa kabila nito, sinabi ng DILG secretary na ang kanyang kapatid ay “filterless” sa kung sino mapananagot at “no one interferes him, not even the President.” RNT/JGC
