MANILA, Philippines – Inaasahang makakaapekto ang Northeast Monsoon o Amihan at easterlies sa ilang bahagi ng bansa sa araw ng Pasko, sinabi ng Philippine Atmospheric, Geophysical and Astronomical Services Administration (PAGASA) nitong Lunes, Disyembre 22.
Sa special weather outlook para sa araw ng Pasko, sinabi ng PAGASA na bukas, Disyembre 24, ang Amihan ay magdadala ng bahagyang maulap hanggang sa maulap na kalangitan na may isolated light rains sa Batanes at Babuyan Islands.
Samantala, bahagyang maulap na may posibilidad ng isolated rain showers o thunderstorms ang mararanasan sa silangang bahagi ng bansa dahil sa easterlies.
Sa araw ng Pasko, Disyembre 25, ang probinsya ng Batanes, Cagayan, at Apayao ay magkakaroon ng maulap na kalangitan na may kalat-kalat na mahinang pag-ulan dahil sa Amihan.
Bahagyang maulap hanggang sa maulap na kalangitan na may isolated light rains naman ang iiral sa Metro Manila, MIMAROPA, Central Luzon, Ilocos Region, nalalabing bahagi ng Cordillera Administrative Region (CAR), nalalabing bahagi ng Cagayan Valley, Cavite, Laguna, Batangas, at Rizal.
Ang nalalabing bahagi ng Luzon at Kanlurang Visayas ay magkakaroon ng bahagyang maulap hanggang sa maulap na kalangitan na may isolated rain showers.
Samantala, bahagyang maulap hanggang sa maulap na kalangitan na may tsansa ng localized rain showers o thunderstorms ang mararanasan sa nalalabing bahagi ng bansa dahil sa easterlies.
“Light to moderate easterly to northeasterly winds with slight to moderate seas will prevail over the entire archipelago on December 24,” ayon sa PAGASA.
“For the rest of the forecast period, winds will be moderate to strong northeasterlies with moderate to rough seas over Northern Luzon, while light to moderate northeasterlies with slight to moderate seas will prevail over the rest of the country,” dagdag pa. RNT/JGC
