MANILA, Philippines – Maaaring maharap sa ethics complaint si Batangas 1st district Rep Leandro Leviste dahil sa alegasyon na illegal niyang kinuha ang mga file mula kay dating Public Works and Highways undersecretary Maria Catalina Cabral, ayon kay House public accounts committee chairperson Terry Ridon nitong Martes, Disyembre 30.
Ayon sa ulat, inihayag ng ilang tauhan ng DPWH na nagtamo ng sugat sa katawan si Cabral matapos pwersahang kunin ni Leviste ang mga dokumento mula sa kamay nito. Wala ring basbas na ginamit at kinopya ng mambabatas ang mga file mula sa kompyuter sa opisina ng DPWH.
“Nakakabahala po ‘yung ulat noong mga DPWH personnel kung saan sinabi talaga nila roon na parang sapilitan ‘yung pagkuha ng mga files mula sa DPWH office, sa office ni Undersecretary Cabral ni Congressman Leandro Leviste. So ‘yun ‘yung unang malaking usapin. So we’d like to get more information about that. So ‘yon pong mga nagsalita na mga kawani, pwede ‘yun imbitahan ‘yan doon sa ethics complaint na pwedeng isampa laban kay Congressman Leviste,” sinabi ni Ridon.
Nang tanungin kung sino ang maaaring maghain ng ethics complaint, sinabi ni Ridon na, “Puwede hong ‘yung DPWH personnel ‘yung mag-file po ng complaint na ito. Pwede rin po na, siyempre, ‘yung mga kababayan po natin na talagang interesado sa usapin po na ito. At siyempre, pwede rin po magkaroon ng mga motu proprio proceedings ang House ethics committee to look into these particular details.”
“Mas mahalaga, ‘yun pong paulit-ulit ‘yung sinasabi na may authority to obtain the files. For the longest time, ‘yan po ‘yung binabanggit niya. Pero apparently, si Secretary (Vince) Dizon na po mismo ‘yung nagsabi twice or thrice, flatly denying giving any authority to Congressman Leviste. So I think malaking usapin ho ‘yun,” aniya.
“Mahalaga rin po sa Kamara ‘yung pamamaraan kung paano po nakuha ito pong mga files na ito. Kasi tingin ko hindi ho dapat ginagawa ng House member, kung totoo po ‘yung sinabi ng DPWH, ‘yung ganyan pong porma ng pagkuha po ng mga files at ‘yung pagsasalita na merong otoridad na kumuha ng mga dokumento when in fact, wala naman pala,” dagdag pa ni Ridon.
Iginiit din niya ang kahalagahan ng legal na pagkuha ng dokumento.
“Kasi pagka hindi maayos ‘yung chain of custody, transfer po ng documents, katulad ng binabanggit po ng Ombudsman, ‘yun pong reliability at kredibilidad po ng mga hawak po ni Congressman Leviste na files will obviously be put into question. And actually, even without talking about, you know, the manner by which the files were obtained, ‘yung pong disclosures niya in the last couple of days had basically been put into the spotlight dahil marami ho talagang mga untruths doon sa mga sinasabi niya,” paliwanag ni Ridon.
“It had already been more than three months, and Ms. Cabral is already dead at this point. So ibig sabihin, how in the world can we actually be certain that whatever it is that Congressman Leviste is actually disclosing at this point are the same documents that had been transferred to him illegally, and lawfully transferred to him on September the 4th. Hindi na ho natin ‘yun alam.”
Ayon kay Ridon, kabilang sa mga hindi umano totoong sinabi ni Leviste ay ang mga alegasyon nito sa kanya na mayroon siyang budget insertions sa 2025 national budget maging ang mga alokasyon ng mga dating miyembro ng Kamara na namayapa na.
“For example, sa akin, may sinasabi siyang mga insertions that I had made pero, in fact, hindi ho talaga totoo dahil hindi pa ako congressman noon. And more importantly, may mga patay nang mga kongresista katulad ni former congressman (Edward) Hagedorn, former congresswoman (Marisol) Panotes na nandoon supposedly sa listahan niya pero mga patay na ho. So ibig sabihin, the question is, how can they actually make insertions?” tanong ni Ridon.
“So kumbaga, the credibility of the document and the credibility of Congressman Leviste is basically at stake here. And katulad nga ng binabanggit ng Ombudsman na nga, pagka ganyan ‘yung proseso, parang may problema sa talagang kredibilidad nito pong pagsasabi po ni Congressman Leviste,” dagdag pa niya.
Nang tanungin naman patungkol sa alegasyon ni Leviste na ang Bases Conversion and Development Authority (BCDA) ay may flood control allocations, sinabi ni Ridon na wala siyang nakitang ganoong probisyon sa 2026 budget at hindi niya alam kung ang tinutukoy ba ni Leviste ay ang panahon nang si DPWH Sec Vince Dizon ay pinuno pa ng BCDA.
“Yon pong mga ganyang very vague statements, talagang we really have to take it with a grain of salt. Ibig sabihin, parang I guess by this time, dapat the public should really be suspicious on each and every statement that Congressman Leviste had been stating in the last couple of days,” tugon ni Ridon.
Sinabi rin ni Ridon na si Leviste ay gumagamit ng “squid tactics.”
“Well, obviously, that has been a pattern of Congressman Leviste on every time he is confronted with truths and facts, no? Kadalasan, iniiwas niya. Basically, squid tactics ‘yon, di ba? Kumbaga, you’re confronted with something but you respond with something else. Hindi ba? That is a classic squid tactic moves ng isang tao.” RNT/JGC
