MANILA, Philippines – Ilalabas na ang subpoena para kay Senador Jinggoy Estrada at dating Senador Ramon ‘Bong’ Revilla Jr. kaugnay sa plunder charges na kinakaharap ng mga ito dahil sa umano’y kickback na tinanggap ng mga ito mula sa flood control projects, ayon kay Prosecutor General Richard Fadullon nitong Sabado, Enero 17.
Ito ang sagot ni Fadullon nang tanungin kaugnay sa status ng mga kasong inihain laban kina Estrada at Revilla.
Ani Fadullon, magsisimula ang preliminary investigation sa mga kaso sa susunod na linggo.
“I believe by next week, this coming week, we will be issuing subpoenas already in connection with those cases. That means the preliminary investigation into them will already begin,” ani Fadullon sa Saturday News Forum.
Sinabi rin nito na bago sila magsimula sa preliminary investigation, ay dumaan muna ang mga kaso sa fact-finding sa National Bureau of Investigation at referral sa Office of the Ombudsman.
Idinagdag ni Fadullon na natanggap nila ang mga rekord mula sa Office of the Ombudsman, kung saan sinuri nito kung sapat ang ebidensya para ituloy ang kaso.
Samantala, sinabi ni Department of Justice (DOJ) spokesperson Undersecretary Polo Martinez na ang plunder charges ay hindi lamang mula sa Bulacan kundi sa buong bansa at ang illegal na pagkakakuha ng yaman na mahigit P50 milyon.
Nauna nang sinabi ni Martinez na ang reklamo ay hindo lamang nakasasakop sa plunder kundi maging sa mga paglabag ng Anti-Graft and Corrupt Practices Act, at Code of Conduct and Ethical Standards for Public Officials and Employees.
Matatandaan na sinabi ni dating Department of Public Works and Highways (DPWH) Undersecretary Roberto Bernardo na inihatid niya ang P125 milyon sa bahay ni Revilla noong Disyembre 2024, at P250 milyon naman sa aide nito bago ang May 2025 elections.
Itinanggi ni Revilla ang mga alegasyon at sinabing ang ipinasa ni Bernardo ay “just a tabular enumeration of projects allegedly suggested by the DPWH. It did not come from the senator himself.”
Sinabi rin ni dating DPWH Bulacan first district engineer Henry Alcantara na tinanong siya ni Bernardo sa 2024 budget hearing sa Senado kung “wanted to add anything since there was still P355 [million] available — according to Undersecretary Bernardo, it was for SJE.”
Iginiit naman ni Alcantara na wala siyang direktang komunikasyon sa senador. RNT/JGC
