MANILA, Philippines – Kailangan umanong umuwi ni dating Ako Bicol party-list representative Zaldy Co sa bansa kung nais nitong tumestigo sa isa sa impeachment complaints laban kay Pangulong Ferdinand Marcos Jr., ayon kay House Committee on Justice chairperson Gerville Luistro nitong Sabado, Enero 24.
“Ang nasa ilalim po ng rules ng impeachment, dapat sa Justice Committee chair panunumpaan lahat ng affidavits and counter affidavits. And that includes the giving of testimony before the Justice Committee,” ani Luistro.
“Kung itong mga intended witnesses are willing to come before the Justice Committee and take their oath, of course they can testify… Lahat po ng ebidensiya supporting the impeachment complaint has to be sworn in before the Justice Committee,” dagdag pa nito.
Nang tanungin kung kailangan ni Co na umuwi ng bansa kung siya ay nais tumestigo, sinabi ni Luistro na “Definitely.”
Ayon kay Interior and Local Government Secretary Jonvic Remulla, si Co ay pinaniniwalaang tumutuloy sa loob ng isang gated community sa Lisbon, Portugal.
Si Co ay mayroong arrest warrant kaugnay sa maanomalyang flood control projects.
Noong Nobyembre ay hinamon ni Marcos si Co na umuwi na at harapin ang mga akusasyon laban sa kanya.
Ito ay matapos na akusahan ni Co ang Pangulo at pinsan nitong si Leyte Representative at dating Speaker Martin Romualdez, maging ang iba pang mga Gabinete na nagpapasok umano ng P100 bilyon sa national budget.
Agad namang pinabulaanan ng Malakanyang ang mga akusasyon at sinabing ang mga ito ay “pure hearsay.”
Samantala, si dating partylist lawmaker Michael Defensor, isa sa mga complainant sa ikatlong impeachment complaint, ang nagsabing handang tumestigo si Co sa naturang reklamo.
“Noong malaman ni Zaldy Co na mag-file kami ng impeachment complaint at lalo’t malaman niya na binlock, he is willing to testify to enhance the impeachment complaint we had filed. Ang sabi niya noon nga sa Senate, ay gusto na niya sa Blue Ribbon Committee. Hindi siya pinayagan. Inaasahan niya, inaasahan namin na dito sa impeachment complaint ay papayagan siya mag-testify,” pahayag ni Defensor. RNT/JGC
