MANILA, Philippines – Pinagtibay ng SC ang hatol ng Court of Appeals (CA) na habambuhay na pagkakakulong na ipinataw sa isang Australian National dahil sa pagpuslit ng apat na menor de edad para sa prostitusyon at sexual exploitation.
Sa desisyong isinulat ni Associate Justice Antonio T. Kho Jr., napatunayang nagkasala si Martin Cook, 76 taong gulang, ng Regional Trial Court (RTC) sa pagpuslit ng apat na batang lalaki na nasa edad 11 hanggang 13 taon.
Bukod sa habambuhay na pagkakakulong, inatasan din si Cook na magbayad ng multang P2 milyon at P600,000 bilang danyos sa bawat isa sa apat na biktima.
Ayon sa press briefer ng Office of the Spokesperson ng SC, hinatulan si Cook ng qualified trafficking sa ilalim ng Republic Act No. 9208 o Anti-Trafficking in Persons Act of 2003, na inamyendahan ng RA 10364.
Natuklasan na inalagaan ni Cook ang mga menor de edad sa kanyang bahay para sa sexual exploitation.
Gayunpaman, sinabi ng RTC na hindi maaaring ipataw ang habambuhay na pagkakakulong dahil sa matandang edad ni Cook, na itinuturing na privileged mitigating circumstance sa ilalim ng Revised Penal Code (RPC).
Sa halip, ipinataw ang reclusion temporal o 12 taon at isang araw hanggang 20 taong pagkakakulong, nang walang posibilidad ng parole.
Ipinaliwanag ng CA na ang habambuhay na pagkakakulong ay isang indivisible penalty at walang mga panahon o antas.
Ipinaliwanag din ng SC na sa mga kaso ng child trafficking, hindi mahalaga ang paraan kung paano ito isinagawa. Hindi kailangang patunayan ng prosekusyon na ginamit ang puwersa, panlilinlang, o pananakot dahil ang isang bata ay hindi maaaring legal na pumayag na ma-traffick. Jocelyn Tabangcura- Domenden
