MANILA, Philippines – Mananatili sa Quezon City Jail sa Payatas si dating senador Ramon “Bong” Revilla Jr. matapos tanggihan ng Sandiganbayan ang kanyang kahilingan na mailipat sa PNP Custodial Facility.
Kasabay nito, tinanggihan rin ng anti-graft court ang motion to dismiss ni Revilla at ng kanyang mga co-accused kaugnay ng P92.8 milyong flood control project sa Pandi, Bulacan. Ayon sa korte, sapat ang mga alegasyon sa kaso upang maitatag ang krimen.
Si Revilla at ang iba pa ay kinasuhan ng graft at non-bailable malversation ng pondo publiko sa pamamagitan ng falsification of public documents. Sa kanyang boluntaryong pagsuko, inutos na siyang ikulong sa Quezon City Jail kasabay ng kanyang mga kasama.
Sa pagtanggi sa kahilingan niyang mailipat, sinabi ng Sandiganbayan Third Division na walang batayan ang kanyang reklamo sa panganib, harassment, o banta sa kanyang buhay.
Personal namang binisita ng mga justices noong Enero 23 ang jail at nakita nilang ligtas at maayos ang pasilidad: may liwanag, bentilasyon, banyo, shower room, kama, at puripikadong tubig.
Nag-alala si Revilla sa posibleng gang-related violence, ngunit tiniyak ng Jail Superintendent Maria Lourdes Pacion na limang jail guards ay ilalaan lamang para sa kanya.
Ayon sa korte, mahigpit ang security checks sa mga bisita at may CCTV monitoring sa bawat area.
Ang resolusyon ay isinulat ni Third Division Chairperson Associate Justice Karl B. Miranda, kasama sina Associate Justices Ronald B. Moreno at Fritz Bryn Anthony M. Delos Santos. RNT/MND
