MANILA, Philippines – Ibinasura ng Department of Justice (DOJ) ang reklamong cyberlibel na isinampa ni Senador Risa Hontiveros laban sa isang abogado at limang social media personalities na umano’y nagpakalat ng alegasyon na siya ay nag-impluwensya sa isang lalaki na magpatotoo laban kay dating Pangulong Rodrigo Duterte at ilang iba pa.
Sa 26-pahinang resolusyon napagpasyahan ng panel ng mga prosecutor na walang sapat na ebidensya para kasuhan sina abogado Ferdinand Topacio, Bryon Cristobal o Banat By, Jeffrey “Ka Eric” Celiz, Krizette “Kiffy” Chu, Jose “Jay” Sonza, at Alex Destor o Tio Moreno. Ayon sa resolusyon,
Sinabi ng Korte Suprema na ang mga pahayag ng mga respondent laban kay Hontiveros-Baraquel ay maaaring nakakasakit, ngunit hindi sila actionable o maaaring kasuhan.
Dagdag pa nito, sinabi ng Korte Suprema na ang pagiging sensitibo ay walang lugar sa ganitong klase ng serbisyo, lalo na kung ito’y maaaring magdulot ng chilling effect sa publiko.
Hindi rin napatunayan ang actual malice. Ayon sa panel, “Hindi napatunayan na ang mga mapanirang pahayag ay ginawa nang may kaalaman na ang mga ito ay mali o may reckless disregard kung ang mga ito ay totoo o hindi.”
Samantala, sinabi ni Topacio na ang desisyon ay isang “pagpapatunay” ng karapatan ng bawat mamamayan na punahin ang mga opisyal ng gobyerno sa nakikitang maling gawain.
Noong 2025, sinabi ni Michael Maurillo na pinilit siya ni Hontiveros na magsalita laban kina Duterte, Pangalawang Pangulong Sara Duterte, at nakakulong na pastor na si Apollo Quiboloy.
Ayon kay Maurillo, ang lahat ng kanyang sinabi, pati na rin ng iba pang mga saksi sa pagdinig ng Senate Committee on Women, Children, Family Relations, and Gender Equality, ay pawang gawa-gawa lamang.
Nauna nang nagpatotoo si Maurillo sa isang pagdinig sa Senado na sinaktan siya ni Quiboloy at siya ay inabuso ng ilang miyembro ng Kingdom of Jesus Christ (KOJC). Sinabi rin niyang nakita niya ang mga Duterte na may dalang armas habang bumibisita kay Quiboloy.
Inakusahan ni Hontiveros ang mga respondent na nagpakalat at nagpalala ng video. Naghain din ang senador ng hiwalay na reklamong cyberlibel laban kay Maurillo sa DOJ.
Mariing itinanggi ni Hontiveros ang mga alegasyon, at sinabi na bago pa man ilabas ang video, lumapit si Maurillo sa kanya upang humingi ng tulong dahil umano’y kinidnap at ikinulong siya sa Glory Mountain sa Davao City. Jocelyn Tabangcura-Domenden
