MANILA, Philippines – Patuloy na lumalago ang domestic liquidity ng Pilipinas noong Disyembre 2025, batay sa preliminary data na inilabas ng Bangko Sentral ng Pilipinas (BSP).
Ang domestic liquidity, o halaga ng perang umiikot sa ekonomiya, ay lumago ng 7 percent year-on-year sa ₱20.1 trillion noong Disyembre.
Kilala rin bilang M3, ang paglago ng domestic liquidity ay mas mabagal naman noong Disyembre kumpara sa 7.6 percent na pagtaas noong Nobyembre.
Sa kabila nito, nananatiling stable ang M3 mula Nobyembre matapos mag-adjust para sa seasonal fluctuations.
Ang M3 ay isang panukat sa suplay ng pera kabilang ang mga nasa sirkulasyon, bank deposits, at iba pang financial assets na madaling ma-convert sa cash.
Bilang driver ng money supply, ang claims sa domestic sector, kabilang ang private at government entities sa bansa, ay tumaas ng 10.1 percent year-on-year noong Disyembre mula sa 10.6 percent noong Nobyembre.
Ang claims sa sektor ay nagrerepresenta sa liabilities ng sektor sa depository corporations.
Kasabay ng pagbagal ng paglago ng bank lending sa non-financial private corporations at households, ang claims sa pribadong sektor ay lumago ng 10.1 percent noong Disyembre mula sa 11.1 percent sa nagdaang buwan.
Tumaas din ang net claims sa central government ng 10.8 percent noong Disyembre mula sa 11.0 percent noong Nobyembre dahil sa mataas na borrowings.
“Net foreign assets (NFAs) in peso terms rose by 6.1 percent year-on-year in December from 4.4 percent in November. NFAs represent the difference between claims on nonresidents and liabilities to nonresidents of depository corporations,” ayon sa BSP.
Ang NFAs ng BSP ay tumaas ng 5.3 percent. Lumago rin ang NFAs ng mga bangko sa account ng mas malaking holdings ng foreign currency-denominated debt securities.
“The BSP will continue to ensure that domestic liquidity conditions remain consistent with its price and financial stability objectives,” ayon pa sa BSP. RNT/JGC
