MANILA, Philippines – Inanunsyo ng National Grid Corporation of the Philippines (NGCP) ang pagtaas ng transmission charges na makikita sa mga bayarin sa kuryente ngayong Pebrero 2026.
Ayon sa advisory ng NGCP, tumaas ng 13.55 porsiyento ang kabuuang average transmission rate sa P1.5279 kada kilowatt-hour (kWh), mula sa P1.3455 per kWh noong nakaraang billing period.
Ipinaliwanag ng NGCP na ang pagtaas ay dulot ng mas mataas na ancillary services (AS) at transmission wheeling rates. Umakyat ang AS rate, na sumasaklaw sa mga serbisyong kinukuha mula sa reserve market at bilateral contracts, sa P0.6736 per kWh mula sa P0.5971 per kWh. Tumaas din ang transmission wheeling rate sa P0.6921 per kWh mula sa P0.6058 per kWh.
“For the February 2026 electric bill of power consumers, NGCP charges only around 69 centavos per kWh for the delivery of its services,” ayon sa grid operator, at iginiit na ang kanilang kita ay kinokontrol at may limitasyon mula sa Energy Regulatory Commission (ERC).
Dagdag pa ng NGCP, ipinapasa sa mga end-user sa pamamagitan ng distribution utilities at electric cooperatives ang transmission charges para sa January billing period. Dave Baluyot
