MANILA, Philippines – Ayon sa Second Congressional Commission on Education (EDCOM II), hindi lang migration ang sanhi ng lumalalang kakulangan ng healthcare workers sa bansa kundi pati ang mahinang education at training pipeline.
Tinatayang kailangan pa ng 290,000 karagdagang health professionals sa buong bansa.
“Estimates indicate that roughly 56 percent of students entering healthcare degree programs—about 33,000 individuals annually—never reach the workforce,” ayon sa EDCOM II.
“Without immediate and strategic intervention, the country faces a shortage of approximately 290,000 healthcare professionals needed to meet the needs of the population,” dagdag nito.
Tinatayang 59,000 estudyante ang pumapasok taun-taon sa healthcare degree programs.
Sa bilang na ito, 15,000 ang hindi nakakatapos, at 11,000 ang bumabagsak sa licensure exams—kaya 32,000 lamang ang nagiging lisensyadong propesyonal.
Dagdag pa rito, halos 27,000 healthcare workers ang umaalis ng bansa bawat taon. Dahil dito, inaasahang magkukulang ng 94,000 doktor at 196,000 nars, bukod pa sa libo-libong midwives at allied health professionals.
Sa 80 medical schools sa bansa, 28 lamang ang pampubliko. May mga rehiyon tulad ng Region 10 at Cordillera Administrative Region na walang public medical school.
Mas malala sa dental education—34 lang ang dental schools sa bansa at halos isang-katlo ay nasa Metro Manila. May 12 rehiyon, kabilang ang BARMM, MIMAROPA, at Region V, na halos walang access sa dental education providers.
Mayroon ding 3,300 bakanteng plantilla positions sa Department of Health, dahilan upang manatiling kulang sa tauhan ang mga pampublikong ospital at rural health units.
Bilang tugon, inilatag ng EDCOM II ang Workforce Development Plan upang gawing “demand-driven” ang healthcare education. Kabilang sa mga hakbang ang [agpapalawak ng scholarships para sa medical at allied health students; pagpapahusay ng training facilities at kalidad ng programa; pagrepaso sa licensure policies; at pagpapalakas ng return service requirements, lalo na sa “Doktor Para Sa Bayan” program.
Nakikipag-ugnayan din ang mga ahensya tulad ng Department of Education (DepEd), Technical Education and Skills Development Authority (TESDA), at Commission on Higher Education (CHED) upang ihanay ang mga programa sa pangangailangan ng labor market.
Binigyang-diin ng EDCOM II na ang pag-ayos sa education pipeline ang susi upang matugunan ang pangmatagalang kakulangan sa healthcare workers at matiyak na may sapat na serbisyong pangkalusugan ang mga Pilipino sa mga susunod na taon. RNT/MND
