MANILA, Philippines – Ilulunsad ng Department of Science and Technology (DOST) ang National Artificial Intelligence Center for Research and Innovation (NAICRI) sa Pebrero 26 bilang pangunahing sentro ng bansa para sa artificial intelligence research at innovation.
“NAICRI will serve as the Philippines’ central hub for AI (artificial intelligence) research, advanced computing, and innovation — designed to provide continuity, coordination, and governance beyond individual projects and funding cycles,” ayon kay DOST Secretary Renato Solidum Jr.
Ipapakita ng sentro ang mga operational AI platforms at tools na binuo ng DOST, kabilang ang NAIRA (Nexus for AI Research and Applications), DIMER (Democratized Intelligent Model Exchange Repository), at iTANONG.
Magbibigay ang NAIRA ng access sa computing resources, AI models, at deployment tools para sa mga ahensiya ng gobyerno, researcher, at micro, small and medium enterprises. Papayagan naman ng DIMER ang pagbuo at paggamit ng AI models para sa agriculture, disaster detection, at traffic analysis, habang ang iTANONG ay magbibigay-daan sa paghahanap ng organizational data gamit ang wikang Filipino.
Ayon sa DOST, magsisilbing lider ang NAICRI sa pagtukoy ng national AI research priorities at pakikipag-ugnayan sa pamahalaan, academe, at industriya. Magbibigay rin ito ng reusable AI templates at data systems para sa mga aplikasyon sa health, disaster risk reduction, agriculture, at traffic management.
“The Center ensures that functional systems become enduring national assets – well-governed, scalable, and accessible beyond Metro Manila,” ayon sa DOST.
Gaganapin ang paglulunsad sa Maynila at dadaluhan ng mga opisyal ng pamahalaan, mambabatas, kinatawan ng academe, industriya, development partners, at international collaborators. Dave Baluyot
