MANILA, Philippines – Tatlong Chinese nationals na inaresto dahil sa overstaying at umano’y identity theft ang nahaharap ngayon sa deportation proceedings, ayon sa Bureau of Immigration (BI).
Inaresto noong Pebrero 16 sina Fang Li (36), Chen Youliang (38), at Xu Yuxiang (39) sa isang condominium unit sa Barangay Tambo, Parañaque City sa isinagawang enforcement operation.
Batay sa intelligence information, sinabi ng BI na si Fang ay sangkot umano sa ilegal na aktibidad at gumagamit ng identidad ng ibang Chinese national. Itinuturing siyang “overstaying alien” matapos mabigong mag-apply ng visa extension o conversion nang huli siyang pumasok sa Pilipinas bilang temporary visitor noong 2022.
Naaresto rin sina Chen at Xu sa parehong operasyon. Ayon sa BI, may Blacklist Order si Chen at dati nang binigyan ng Order to Leave dahil sa paglabag sa kondisyon ng kanyang visa. Itinuring din siyang “undocumented alien” dahil wala siyang maipakitang valid passport o immigration documents nang arestuhin.
Si Xu naman ay natukoy na “overstaying alien” matapos mapag-alamang nag-expire ang kanyang visa extension noong 2020.
Nagbabala si BI Commissioner Joel Anthony Viado na hindi palalampasin ang mga dayuhang lalabag sa immigration laws ng Pilipinas.
“Foreign nationals who attempt to circumvent our laws through aliases, fraudulent identities, or expired visas will be apprehended and deported,” ani Viado.
Kasalukuyang nasa kustodiya ng BI Warden Facility ang tatlo habang hinihintay ang desisyon sa kanilang deportation. RNT/MND
