MANILA, Philippines – Naka-depende sa Kongreso kung aalisin ang pagbabayad ng travel tax ng mga Filipino na bibiyahe abroad, ayon kay Finance Secretary Frederick Go.
“We leave it to the wisdom of Congress,” sinabi ni Go kaugnay sa posisyon ng Department of Finance sa naturang usapin.
Ani Go, ang koleksyon ng travel tax ay hindi napupunta sa national government.
“There’s none that goes to the national government. The total, I believe, the total travel tax revenue is P8 billion a year. So that’s your estimate.”
“Fifty percent goes to TIEZA, 40% goes to CHED, [and] 10% goes to the arts,” dagdag pa niya.
Isinama ni Pangulong Ferdinand Marcos Jr. ang panukalang pagbuwag sa travel tax sa priority list ng administrasyon ngayong taon.
Kamakailan ay ipinanukala ni House Majority Leader Ferdinand Alexander ”Sandro” Marcos, anak ng Pangulo, ang pagbuwag sa pagpataw ng travel tax sa mga Pinoy na bumibiyahe abroad para magbakasyon.
Layon ng House Bill 7443 na bawiin ang Presidential Decree No. 1183 at related provisions ng Tourism Act of 2009 na nagpapataw ng travel tax na nagkakahalaga ng P1,620 sa economy class travelers at P2,700 sa first-class passengers.
Nauna nang ibinabala ni Tourism Secretary Christina Frasco na ang pag-alis sa tax nang walang substitute fund ay maaaring makaapekto sa sektor ng turismo.
Ipinaliwanag ni Frasco na ang 50% ng travel tax collections ay sumusuporta sa tourism infrastructure katulad ng tourist rest areas, visitor centers, at jetty ports.
Nasa 40% naman ng pondo ay napupunta sa tourism education sa pamamagitan ng Commission on Higher Education, at 10% para sa preservation ng heritage structures sa buong bansa. RNT/JGC
