MANILA, Philippines – Naglabas ang Department of Agriculture-Fertilizer and Pesticide Authority (DA-FPA) ng Show Cause Order laban sa DQB Green Agricultural Products Trading sa Makilala, North Cotabato, dahil sa umano’y ilegal na paggawa ng pataba.
Ayon kay Glenn Estrada, FPA Executive Director, bahagi ito ng hakbang ng gobyerno para protektahan ang industriya ng fertilizer at kapakanan ng mga magsasaka.
“Inspections and enforcement will continue to prevent unsafe products from reaching farmers. This Show Cause Order sends a clear message that regulatory compliance is not optional, and violators will be held accountable,” ani Estrada.
Sa isang surprise inspection noong Pebrero 20, natuklasan ng FPA na gumagawa at nag-rebag ng fertilizer ang establisimyento nang walang valid license to operate (LTO). Huminto rin ang distribusyon at bentahan ng 1,352 bags ng fertilizer, kabilang ang Takada 14-14-14, matapos maglabas ng Stop Use, Move, and Sale (SUMS) Order ang FPA.
Dagdag pa ng ahensya, walang valid LTO ang DQB para sa production site, at ginamit nito ang ipinagbabawal na “spinning palanggana” method na nakansela na dahil sa paulit-ulit na laboratory failures at off-specification nutrient content. “The manufacturing equipment also failed to meet regulatory requirements,” ani ng FPA. (Santi Celario)
