MANILA, Philippines – Nasamsam ng mga awtoridad ang tinatayang ₱142.8 milyong halaga ng shabu matapos maaresto ang dalawang hinihinalang drug personalities sa buy-bust operation sa Quezon City nitong Miyerkules, Marso 11, ayon sa Philippine Drug Enforcement Agency (PDEA).
Kinilala ang mga suspek sa alyas na “Rolando,” 42, at “Eli,” 28, na kapwa motorcycle taxi drivers. Naaresto sila bandang 3:10 ng madaling araw sa Biak na Bato Street sa Barangay Santo Domingo.
Isinagawa ang operasyon ng PDEA Special Enforcement Service, PDEA Regional Office–National Capital Region Quezon City District Office, at Philippine National Police Drug Enforcement Group matapos ang entrapment operation.
Ayon sa PDEA, nasa 21 kilo ng shabu ang nasamsam sa operasyon, na nakalagay sa mga plastic container—palatandaan ng malakihang drug trafficking na maaaring mag-supply ng ilegal na droga sa Metro Manila at mga karatig na lugar.
Nahuli ang mga suspek habang nagbebenta ng 500 gramo ng shabu sa isang undercover agent na nagpanggap na buyer. Sa sumunod na paghahalughog sa kanilang sasakyan at mga gamit, nadiskubre pa ang karagdagang 20.5 kilo ng shabu.
Nasamsam din ng mga awtoridad ang buy-bust money, isang Toyota Hiace Grandia, iba’t ibang ID, mga cellphone, at digital weighing scale.
Mahaharap ang dalawang suspek sa kasong paglabag sa Section 5 (Sale of Dangerous Drugs) at Section 11 (Possession of Dangerous Drugs) kaugnay ng Section 26 (Conspiracy to Sell) ng Comprehensive Dangerous Drugs Act of 2002 o Republic Act 9165. RNT/MND
