VATICAN – Tinanggap ni Pope Leo XIV ang pagbibitiw ng isang obispo mula sa komunidad ng Chaldean Catholic sa Estados Unidos matapos siyang maakusahan ng paglustay ng pondo ng simbahan.
Hindi nagbigay ng dahilan ang Vatican sa pagbibitiw ni Bishop Emanuel Hana Shaleta mula sa Chaldean Catholic Eparchy of St Peter the Apostle sa California, na inanunsyo nito sa isang pahayag noong Martes.
Ngunit ayon sa San Diego County Sheriff’s Office, inaresto si Shaleta noong Marso 5 sa paliparan habang sinusubukang umalis ng bansa.
Inaresto siya para sa walong bilang ng paglustay, walong bilang ng money laundering, at isang bilang ng “aggravated white collar crime enhancement.”
Siya ay iniimbestigahan mula pa noong Agosto matapos magsumbong ang isang miyembro ng simbahan ukol sa alegasyon ng paglustay.
Si Shaleta ay nakadetine sa San Diego central jail na may piyansang $125,000, ayon sa sheriff’s office.
Ayon pa sa ulat, ang Obispo ay inakusahan ng paglustay ng $270,000 (232,000 euros), at hindi siya umamin sa mga paratang laban sa kanya noong Lunes.
Ang Chaldean Church ay isang Eastern Catholic Church na may kasaysayan sa Iraq at Iran, na nakabase sa Baghdad.
Si Shaleta ay ipinanganak sa Iraq noong 1956, ayon sa website ng kanyang simbahan, at nasa Estados Unidos na mula pa noong 1987.
Ang diaspora ng Chaldean sa Estados Unidos ay isa sa pinakamalaki nito.
Inanunsyo rin ng Vatican noong Martes na tinanggap ng papa ang pagbibitiw ng patriarch ng Chaldean Church, si Louis-Raphael Sako.
Ayon sa Vatican News, tinalakay ni Cardinal Sako ang pagreretiro dalawang taon na ang nakalipas, noong siya ay 75, kasama ang dating Pope Francis ngunit hinihikayat siyang manatili. Walang koneksyon na ginawa ng Vatican sa pagitan ng dalawang kaso. Jocelyn Tabangcura-Domenden
