VATICAN – Iminungkahi ni Pope Leo na ang mga Kristiyanong lider na nagsisimula ng digmaan ay dapat mangumpisal at suriin kung sinusunod nila ang mga aral ni Hesus, nang hindi binabanggit ang anumang tiyak na lider o digmaan.
Bagamat hindi nagbanggit si Leo ng pangalan, nitong mga nakaraang araw ay pinalalakas niya ang panawagan para tapusin ang patuloy na digmaan sa Iran, na nagsimula sa magkasanib na airstrikes ng U.S. at Israel noong Pebrero 28.
Si U.S. President Donald Trump ay pinalaki sa pananampalatayang Presbyterian Christian, habang ang ilan sa kanyang mga pangunahing opisyal, tulad ni Vice President JD Vance at Secretary of State Marco Rubio, ay mga Katoliko.
Itinuro ni Hesus sa kanyang mga tagasunod ang pagiging mapayapa, at karaniwang tinututulan ng Simbahang Katoliko ang digmaan.
Sa loob ng maraming siglo, sinusuri ng Simbahan ang mga digmaan gamit ang tradisyong “just war,” na may mga pamantayan upang matukoy kung ang isang digmaan ay moral na makatwiran, gaya ng pagtatanggol laban sa hindi makatarungang pananakop.
Sinabi ni Cardinal Robert McElroy ng Washington, D.C. nitong linggo na ang mga airstrikes ng U.S. at Israel laban sa Iran ay “hindi moral na lehitimo” dahil hindi ito pumasa sa pamantayan ng Simbahan para sa “just war.”
Nagbigay si Pope Leo ng talumpati sa isang kumperensya sa Vatican tungkol sa kumpisal, kung saan inaamin ng mga Katoliko ang kanilang mga kasalanan sa pari at humihingi ng kapatawaran mula sa Diyos.
Ayon sa Santo Papa, ang ritwal na ito ay nakakatulong hindi lamang sa indibidwal na Katoliko kundi sa pagpapalaganap ng kapayapaan at pagkakaisa sa lipunan. Jocelyn Tabangcura-Domenden
