MANILA, Philippines – Hinimok ni Manila Archbishop Jose Cardinal Advincula nitong Linggo ng Pagkabuhay ang mga tao na ang Panahon ng Pasko ng Pagkabuhay ay nagtutulak sa mga Katoliko na labanan ang galit at alitan sa gitna ng patuloy na kaguluhan sa Gitnang Silangan.
Inihayag ni Advincula na ang Muling Pagkabuhay ni Hesus ay pinaka-subersibo at rebolusyonaryong mensahe ng Kristiyanismo.
Ito ay isang panawagan sa paglaban — upang kontrahin ang mga puwersang walang-awang sumusubok na ibaon ang ating kagalakan at kinabukasan.
“Ang Pasko ng Pagkabuhay ay isang mapayapang laban sa galit at alitan. Ito ay panawagan sa lahat ng tao na tanggihan ang ‘globalization of indifference’ at ang normalisasyon ng genocide,” dagdag pa niya.
Nagsimula ang kaguluhan sa Gitnang Silangan noong Pebrero 28, 2026, nang ang Estados Unidos at Israel ay nagsagawa ng magkakaugnay na pag-atake militar laban sa Iran, na nagdulot ng pagganti mula sa puwersa ng Iran.
Nagresulta ang digmaan sa mahigit 3,000 na pagkamatay sa loob ng isang buwan at sunod-sunod na pagtaas ng presyo ng langis sa buong mundo, dahil naapektuhan ang pagpapadala ng mga produktong petrolyo sa Strait of Hormuz, isa sa pinakamahalagang ruta ng pag-export ng langis sa mundo.
Nanawagan si Advincula sa mga opisyal ng gobyerno na tiyakin ang pananagutan sa pagtugon sa pagdurusa ng mga apektado ng kaguluhan.
Nanawagan si Advincula kasama ang kapwa Obispo para sa pananagutan, para sa walang pagod na paghahangad ng katarungan sa pampublikong pamamahala, at para sa mas agarang aksyon upang maibsan ang pagdurusa ng ating mga kababayan.
Sa Easter Vigil Mass noong Sabado, sinabi ni Cardinal Orlando Quevedo, archbishop emeritus ng Cotabato, na ang sangkatauhan ay kasalukuyang nakararanas ng kadiliman, tulad ng pagtaas ng presyo, krisis sa langis, laganap na korapsyon, at paghihirap ng mahihirap. Ngunit maaaring mapagtagumpayan ng mga mananampalataya ang kadilimang ito sa pamamagitan ng pagmamahal at paglilingkod.
Sa kanyang homily sa Manila Cathedral hinimok niya ang mga Katoliko na magmahal an at maglingkod hindi lamang sa pamilya. Kaibigan o komunidad kundi sa mahihirap at mga nangangailangan.
Ang Panahon ng Pasko ng Pagkabuhay, na tumatagal ng 50 araw, ay magtatapos sa Pentecost Sunday, na ginugunita ang pagbaba ng Espiritu Santo sa mga Apostol at itinuturing na kapanganakan ng Simbahang Katoliko.
Sa taong ito, ang Pentecost Sunday ay sa Mayo 24. Jocelyn Tabangcura-Domenden
