SA gitna ng lumalalang tensyon sa Gitnang Silangan, hindi pinabayaan ng Home Development Mutual Fund o mas kilalang Pag-IBIG Fund ang ating mga bagong bayani. Bilang tugon sa direktiba ni Pangulong Ferdinand “BBM” Marcos Jr., isang espesyal na package ng mga benepisyo ang inaprubahan para sa overseas Filipino workers (OFWs) na direktang apektado ng krisis.
Ang layunin? Agarang ginhawa. Hindi na kailangang maghintay ng matagal para makabangon ang mga pamilyang napilitang umuwi dahil sa gulo.
Ano-ano ang mga Benepisyong Ito?
Ayon kay DHSUD Secretary at Pag-IBIG Chairperson Jose Ramon Aliling, narito ang mga “lifeline” na pwedeng samantalahin ng mga kwalipikadong miyembro:
• 100% Savings Withdrawal: Maaari nang makuha ang buong naipon sa Pag-IBIG Regular Savings (pati ang ambag ng employer at mga dibidendo) kahit hindi pa umaabot sa 20 taon ang kontribusyon.
• MP2 Early Payout: Pwedeng i-withdraw ang buong halaga ng Modified Pag-IBIG II (MP2) kasama ang kinita nito, kahit wala pa ito sa 5-year maturity period.
• 3-Month Loan Holiday: Isang moratorium o pansamantalang pagtigil sa pagbabayad ng Housing Loan sa loob ng tatlong buwan. Walang interes, walang penalty, at awtomatiko pang mae-extend ang loan term.
“Ito ang ambag ng Pag- IBIG Fund sa layunin ng pamahalaan na magkaroon ng ‘whole-of-government approach’ sa pagtulong sa ating mga bayaning OFW,” pahayag ni Secretary Aliling.
Serbisyong Mabilis at Digital
Batay sa pinakahuling datos nitong Pebrero 2026, halos 900,000 ang ating mga rehistradong miyembro sa Middle East, partikular sa Saudi Arabia, Qatar, UAE, at Kuwait. Dahil dito, tiniyak ni Pag-IBIG CEO Marilene Acosta na hindi magiging pahirap ang pag-avail ng tulong.
Maaaring mag-apply online sa pamamagitan ng Virtual Pag-IBIG. Para naman sa mga gustong bumisita sa sangay, bukas ang mahigit 200 offices at OFW Centers:
• Branch Offices: Lunes hanggang Biyernes.
• Mall-based Branches: Martes hanggang Sabado.
Pagtataguyod sa Kinabukasan
Ang hakbang na ito ay bahagi ng mas malawak na programa ng gobyerno na kinabibilangan ng repatriation at job reintegration.
Sa panahon ng kawalan ng katiyakan sa ibang bansa, muling pinatunayan ng Pag-IBIG Fund na sila ay sandigan ng manggagawang Filipino, mula sa pag-iipon hanggang sa oras ng kagipitan.
