BACOLOD, Philippines – Isang 32-anyos na lalaki na tinutukoy na sangkot sa pagpatay sa isang pulis sa buy-bust operation sa Bacolod City ang nasawi sa ospital nitong Sabado ng umaga.
Ayon kay Police Col. Eugene Rebadomia, direktor ng Bacolod City Police, pumanaw ang suspek bandang 5:27 a.m. sa Corazon Locsin Montelibano Memorial Hospital.
Sinabi ng pulisya na ang suspek ay residente ng Barangay Sum-ag at umano’y nakipag-agawan sa armas sa mga operatiba na aaresto sa kanya matapos niyang barilin si Police Master Sgt. Romulo Galvez noong Abril 9 sa Alijis Road, Barangay Singcang.
Hindi dinala sa presinto ang suspek at diretso siyang isinugod sa ospital para sa medical examination matapos siyang ma-restrain ng mga awtoridad.
Pagdating sa ospital, iniulat na siya ay naging magulo at tumangging magpatingin, dahilan upang irekomenda ng doktor ang confinement upang kumalma siya.
Ayon sa pulisya, hinihintay pa ang opisyal na ulat ng ospital kaugnay ng eksaktong sanhi ng kanyang pagkamatay.
Nauna ring sinabi ng mga awtoridad na may rekord ang suspek sa mga kasong robbery at theft sa Bacolod City.
Samantala, nagpaabot ng tulong ang Police Regional Office–Negros Island Region sa pamilya ng nasawing si Galvez, na kinilala bilang isang beteranong pulis at SWAT operative.
Kinilala si Galvez bilang isang “bayani” matapos masawi sa tungkulin sa anti-illegal drugs operation, na tinawag ng lokal na pamahalaan na “ultimate sacrifice” sa kampanya para sa kapayapaan at hustisya. RNT/MND
