MANILA, Philippines – Sinabi ni dating Senate President Franklin Drilon na ang pagpasok ng Korte Suprema sa impeachment case ni Vice President Sara Duterte ay magiging mahalagang pagsubok sa lawak ng kapangyarihang hudisyal ng High Court sa ilalim ng Konstitusyon.
Ayon kay Drilon, ang kaso ay magbibigay-linaw kung hanggang saan maaaring makialam ang Supreme Court sa mga impeachment proceedings na itinuturing na political question at nasa hurisdiksyon ng Kongreso.
“The intervention of the Supreme Court in the impeachment of Vice President Sara Duterte presents an interesting study on the limits of the court’s intervention on what is known or considered as a political question,” ani Drilon.
Binigyang-diin din niya na mahalagang matukoy kung hanggang saan gagamitin ng Korte Suprema ang kapangyarihan nito laban sa “grave abuse of discretion” sa proseso ng impeachment.
“To what extent the Supreme Court will invoke its constitutional power to correct grave abuse of discretion in the political process involving the impeachment of Vice President Duterte will be an interesting study for all of us,” dagdag niya.
Umaasa rin si Drilon na maglalabas ang Korte Suprema ng desisyong tatanggapin at magiging batayan ng legal system ng bansa.
Sinabi rin ng dating senador na ang impeachment ay isang political proceeding na nakatalaga sa Kongreso, at siya mismo ay naging senator-judge sa ilang impeachment trial.
Sa kanyang talumpati sa paglulunsad ng kanyang memoir na Being Frank sa UP College of Law Alumni Weekend, hinikayat din niya ang mga estudyante ng batas na piliin ang prinsipyo kaysa sa karera o prestihiyo.
Binigyang-diin niya na ang tunay na legacy ay hindi nasusukat sa posisyon o parangal, kundi sa mga institusyong napalakas at mga taong na-inspire sa pamumuno. RNT/MND
