MANILA, Philippines – Mas marami pang abogado ang naghain ng petisyon sa Korte Suprema na humahamon sa impeachment proceedings laban kay Vice President Sara Duterte sa Kamara.
Sa 34 pahinang petisyon, hiniling ng mga petitioner na sina Hue Jyro Go, Micah De Guzman, at Jake Leoncini ang SC na mag-isyu ng temporary restraining order (TRO) at/o writ of preliminary injunction para pigilan at ikonsidera ang ikatlo at ikaapat na impeachment complaints, kabilang ang paglalabas ng mga subpoena.
Hinimok din nila ang korte na pigilan at isantabi ang mga finding, acts, rulings, at direktiba ng Kamara na may kaugnayan sa impeachment complaints kabilang ang pagtukoy sa sufficiency in form at substance at ang pag-iisyu ng mga subpoena.
“Its successive issuance of subpoenas, reception of materials outside the complaints, and resort to third-party record-gathering reveal an unmistakable attempt to search for, assemble, and construct evidence not found in the complaints themselves,” saad sa petisyon.
“These acts constitute nothing less than a fishing expedition for evidence,” dagdag pa.
Iginiit ng mga petitioner na ang paglalabas ng subpoena ay sumasalamin sa hindi tamang paglawak ng kapangyarihan ng Kamara para magsagawa ng impeachment at paglabag din sa Konstitusyon at Impeachment Rules.
Sinabi pa nila na ang paghiling para sa statements of assets, liabilities, and net worth (SALNs) sa loob ng ilang taon ay “patently overbroad, absent any demonstrated link to specific omissions actually alleged in the complaints.”
Samantala, nanindigan ang mga petitioner na ang “fair play” ay pwede rin sa political process.
“The totality of these circumstances demonstrates not the sobriety expected of impeachment under the Constitution, but a process increasingly marked by predisposition, ridicule, and active case-building—thus amounting to grave abuse of discretion,” ayon sa petisyon.
Ito na ang ikaapat na petisyon na inihain sa SC kaugnay sa impeachment proceedings.
Ang unang tatlong petisyon ay magkakahiwalay na inihain nina Vice President Sara Duterte, grupo ng mga abogado at isa pang grupo na binubuo ng mga abogado at private citizens.
Inatasan naman ng SC ang Kamara at House committee on justice na magkomento sa mga petisyon. RNT/JGC
