MANILA, Philippines – Iniulat ng Anti-Money Laundering Council (AMLC) sa pagdinig ng House Committee on Justice na umabot sa ₱6.77 bilyon ang kabuuang halaga ng mga bank transactions na na-flag bilang “covered” at “suspicious” na may kaugnayan kay Vice President Sara Duterte at sa kanyang asawang si Manases Carpio mula 2006 hanggang 2025.
Ayon kay AMLC Executive Director Ronel Buenaventura, kinumpirma ng ahensya na may mga transaksyong naitala sa kanilang database na may “red flags.”
“Yes, there are suspicious transactions and covered transactions in our system, database, or record,” ani Buenaventura sa komite.
Sa ulat ng AMLC, natukoy ang 313 covered transactions at 17 suspicious transactions sa mga account ni Duterte, habang 317 covered at 16 suspicious transactions naman sa account ni Carpio.
Sa kabuuang ₱6.77 bilyon, ₱3.77 bilyon ang iniuugnay sa mga account ni Duterte at ₱2.99 bilyon naman kay Carpio.
Ipinakita rin sa datos na may kabuuang inflow na ₱1.83 bilyon sa accounts ni Duterte at ₱2.59 bilyon kay Carpio, o kabuuang ₱4.43 bilyon na deposito. Sa kabilang banda, umabot sa ₱1.21 bilyon ang withdrawals mula sa accounts ni Duterte at ₱343.32 milyon mula kay Carpio.
Mayroon ding ₱791.1 milyon na halaga ng transaksyon na hindi malinaw ang pinagmulan o detalye batay sa available records.
Napansin din ng AMLC ang pagtaas ng halaga ng mga transaksyon sa mga naunang taon, kabilang ang ₱208.15 milyon noong 2007, at pagtaas pa sa pagitan ng 2009 hanggang 2013 kung saan lumampas sa ₱400 milyon ang average kada taon. Kabilang dito ang ₱704.93 milyon noong 2009, ₱648.58 milyon noong 2010, at ₱597.15 milyon noong 2011.
Sa kabuuan, nakapagtala ang AMLC ng ₱3.92 bilyon mula sa 417 transaksyon sa pagitan ng 2005 hanggang 2026, kung saan bumaba ang galaw ng pera sa mga huling taon.
Karamihan sa mga transaksyon ay credit memos na umabot sa ₱1.41 bilyon, kasunod ang debit memos na ₱1.03 bilyon at fund transfers na ₱521.86 milyon. Mayroon ding time deposit pre-terminations, miscellaneous transactions, withdrawals, at check deposits.
Sa parehong pagdinig, sinabi ni Manila Rep Joel Chua na ang mga naturang bank transactions ay hindi umano naipakita sa Statements of Assets, Liabilities and Net Worth (SALN) ng bise presidente.
Ipinunto rin ni Bicol Saro Partylist Rep Terry Ridon ang agwat sa pagitan ng dami ng transaksyon at ng idineklarang net worth ni Duterte sa kanyang SALN.
Ipinaliwanag ni Buenaventura na ang “covered transactions” ay ang mga bank deposits na lampas ₱500,000 sa loob ng isang araw na awtomatikong nire-report sa AMLC, habang ang “suspicious transactions” ay ang mga may kahina-hinalang detalye o posibleng kaugnayan sa ilegal na aktibidad.
Nang tanungin kung ang AMLC report ay ipinakikita lamang ng ahensya alinsunud sa subpoena ng komite, sinabi ni Buenaventura na tuloy tuloy ang monitoring na ginagaw ang AMLC sa mga bank transactions na inaalarma ng mga bangko.
Giit ni Buenavantura, dahil “continuous” ang kanilang monitoring ay nag-generate lamang sila ng latest consolidated report sa account ng mag-asawang Duterte.
“Hindi po kami namimili ng personality. Ang tinitignan po namin dito ay ‘yung data at ‘yung numbers. So ang titignan namin, more than the people behind, ano ba ‘yung movement, flow, frequency ng daloy ng pera at kung meron bang kakaiba dito sa daloy nito. So hinahabol po namin yung pera, hindi yung tao sa likod ng pera,” pagtatapos pa ni Buenaventura. Gail Mendoza
