MANILA, Philippines – Arestado na ang driver ng police mobile na sangkot sa aksidente sa Payatas, Quezon City na ikinamatay ng limang persons under police custody (PUPCs).
Ayon sa Quezon City Police District (QCPD), inaresto ang driver sa Philippine National Police General Hospital (PNPGH) bandang alas-12 ng tanghali noong Sabado.
Sumailalim siya sa Alcohol Breath Analyzer (ABA) test at lumabas na negatibo sa alkohol.
Kasalukuyan siyang nasa inquest proceedings at kakasuhan ng reckless imprudence resulting in multiple homicide, multiple physical injuries, at damage to property.
Ayon kay QCPD chief Police Brigadier General Andy Glenn Silverio, “We assure the public that due process will be strictly observed and that accountability will be upheld,” at idinagdag niyang patuloy na binabantayan ang kalagayan ng mga sugatan at nagbibigay ng tulong sa mga apektado.
Samantala, isa sa mga PUPC ang patuloy na mino-monitor sa Quezon City General Hospital (QCGH) matapos sumailalim sa ilang operasyon at kasalukuyang nasa stable na kondisyon.
Nagbigay rin ang QCPD ng pinansyal na tulong para sa gamot at laboratory tests ng mga biktima. RNT/MND
