MANILA, Philippines – Nakahanda ang liderato ng Kamara sa ilalim ni House Speaker Faustino Dy III na kumuha ng mga batikang abogado upang palakasin ang prosecution team sakaling umakyat sa Senado ang impeachment trial laban kay Vice President Sara Duterte, ayon kay House Committee on Justice Chairman at Batangas Rep Gerville Luistro.
Ayon kay Luistro bagamat may mga abogado sa Kamara, kailangan ng “courtroom expertise” dahil magsisilbing isang pormal na paglilitis ang mangyayari sa Senado.
“So I wish to confirm na kung matutuloy man tayo to be one of the panel of prosecutors, I will really recommend that we engage private prosecutors to help and aid the members of the House who will be joining the panel of prosecutors,” pahayag ni Luistro.
Inamin ni Luistro na kahit mga abogado ang maraming miyembro ng Kamara, hindi na sila gaanong hasa sa aktwal na bakbakan sa loob ng hukuman kumpara sa mga abogadong araw-araw na nasa korte.
“As a matter of fact, itong mga kasama nating lawyers and even myself dito sa House of Representatives, hindi na kami updated about litigation. What will happen in the Senate is trial,” ani Luistro.
Tiyak din na bigating litigation specialists ang kukunin ng defense team ng Pangalawang Pangulo kaya praktikal lamang na kumuha rin ng suporta ang Kamara na sa ilalim ng rules ay hindi naman ipinagbabawal.
Sinabi ni ni Luistro na sa ilalim ng impeachment rules, dapat ay mayroong 11 public prosecutors na manggagaling sa mga miyembro ng House of Representatives na ihahalal sa plenaryo.
“Under the rules, we should be 11 public prosecutors. Pero parang wala namang prohibition if we want to consider a bigger number,” paliwanag ni Luistro.
Sa ngayon, sinabi ni Luistro na hindi pa niya pinag-iisipan kung sasabak siya bilang bahagi ng prosecution panel dahil ang pokus niya ay tapusin ang trabaho sa Justice Committee at depensahan ang Articles of Impeachment sa plenaryo. Gail Mendoza
