UPLIFT Program lalong pinalalakas sa sektor ng transportasyon, seguridad sa pagkain

MANILA, Philippines – BILANG paghahanda sa napipintong pulong tungkol sa UPLIFT (Unified Package for Livelihoods, Industry, Food, and Transport) kasama si Pangulong Ferdinand R. Marcos Jr., pinangunahan ng Office of the Executive Secretary, kasama ang ilang miyembro ng Gabinete, ang pagbuo ng mas mabilis at organisadong tugon ng pamahalaan sa pambansang emergency sa enerhiya.

Tinutukan sa talakayan ang pagpapalawak ng Fuel Subsidy Program upang matiyak ang sapat na serbisyo ng pampasaherong transportasyon.

Ang P10 bawat litro na diskwento ay ibinibigay sa lahat ng jeepney at UV express sa buong bansa. Mahigit 2,000 gas stations naman ang nag-aalok ng diskwento para sa mga pampasaherong sasakyan.

Kasama sa pagpapalawak ng programang ito ang fuel subsidy para sa mga bus at delivery trucks, lalo na ang mga nagdadala ng mga produktong agrikultura at iba pang pangangailangan.

Magkakaroon din ng suporta para sa mga magsasaka at mangingisda upang matiyak ang sapat at abot-kayang pagkain para sa bawat pamilyang Filipino.

Sa utos ni Pangulong Marcos, pinaiigting ang koordinasyon ng mga ahensya upang masiguro na ang mga programang ito ay tunay na maisakatuparan at madama ng taumbayan. KRIS JOSE