MANILA, Philippines – Iniutos ni Philippine National Police (PNP) chief Gen. Jose Melencio Nartatez Jr. ang internal investigation kaugnay ng alegasyong may mga pulis na tumulong o nag-escort kay Senator Ronald “Bato” Dela Rosa palabas ng Senado noong Mayo 14.
Ayon kay Nartatez, mahalagang malinawan ang insidente dahil nakataya ang integridad ng PNP.
“Let me be absolutely clear: the Philippine National Police does not operate on blind because the integrity of our institution is at stake,” ani Nartatez.
Sinabi niyang inatasan na niya ang mga investigative unit na suriin ang logbooks, CCTV footage, at radio dispatches noong araw ng insidente.
Nauna nang kinumpirma ni Pasay City Police chief Col. Joselito de Sesto na siya ang nasa puting police vehicle na nakita sa video na umaalis sa Senado bandang 3 a.m. kasama ang isang black van na hinihinalang sinasakyan ni dela Rosa.
Gayunman, itinanggi ni de Sesto na nagbigay sila ng police escort.
Binigyang-diin ni Nartatez na kung mapapatunayang may unauthorized coordination o logistical support upang makatakas sa legal process, mananagot ang mga sangkot.
“If the investigation reveals that there was any unauthorized coordination, false reporting, or logistical support given to evade legal processes, those involved will face the full brunt of administrative and criminal sanctions,” ani Nartatez.
Nagpakita si dela Rosa sa Senado noong Mayo 11 matapos mawala sa publiko sa loob ng anim na buwan dahil sa mga ulat tungkol sa posibleng arrest warrant mula sa International Criminal Court (ICC).
Inilagay siya noon sa kustodiya ng Senado ngunit kalaunan ay umalis matapos ang insidente ng pamamaril sa Senado noong nakaraang gabi.
Itinanggi rin ni Nartatez na may pahintulot mula sa Camp Crame para sa anumang covert assistance o special movement operation kaugnay ng umano’y pag-alis ni dela Rosa.
“As the Chief of the PNP, I categorically state that the national leadership had no prior knowledge of, nor did it authorize any logistical assistance for, the departure of Senator Dela Rosa from the Senate premises,” pahayag ni Nartatez.
Dagdag pa niya, nakatuon lamang umano ang deployment ng pulis sa public safety, crowd control, at seguridad sa paligid ng Senado matapos ang gunfire incident. RNT/MND
