MANILA, Philippines – Sinabi ni House trial spokesperson Renee Louise Co ng Kabataan Party-list noong Huwebes na malapit na binabantayan ng mga kabataan ang nalalapit na impeachment trial ni Vice President Sara Z. Duterte, dahil mahalaga ito sa magiging direksyon ng politika at pamamahala na mamanahin ng susunod na henerasyon.
Ayon kay Co, “The next generation will inherit the consequences of this trial.”
Dagdag niya, “This is bigger than personalities and political camps. For many young Filipinos, this is about the kind of political culture we normalize, tolerate, and pass on to future generations,”
Ipinunto rin niya na maraming kabataan ang sawa na sa umano’y “toxic politics,” palabas na pulitika, at pamumuno na nakasentro sa personalidad imbes na sa pananagutan at kakayahan.
“Ang daming kabataan ngayon ang sawa na sa endless political drama, scripted outrage, at ingay na walang malinaw na pananagutan,” aniya.
“Gusto nila ng mas seryosong gobyerno, mga lider na may respeto sa institusyon at pananagutan. Hinahanap ng kabataan ang katapatan, transparency, at seryosong serbisyo publiko,” dagdag niya.
Ayon pa kay Co, mas mulat na ang kabataan ngayon sa politika dahil sa direktang nakikita nila online ang mga isyu ng korapsyon, disinformation, at kaguluhan sa politika.
“This generation grew up seeing corruption scandals, disinformation, and political chaos unfold online in real time. Kaya mas mabilis nilang nakikita kung sino ang seryoso sa public service at sino ang nagpapapogi lang para sa camera,” aniya.
Sinabi rin niya na layunin ng House prosecution panel na lapitan ang impeachment trial nang propesyonal, disiplinado, at ayon sa proseso ng Saligang Batas.
Giit niya, hindi ito dapat maging palabas o political theater kundi pagtutok sa ebidensya.
Ayon pa sa kanya, malaki ang magiging epekto ng resulta ng paglilitis sa pananaw ng kabataan sa demokrasya at mga institusyon.
“If institutions show courage, seriousness, and integrity, this trial can also become an important reminder that democracy is still capable of self-correction,”
Dagdag pa niya, “Hindi fandom ang gobyerno. Hindi content creation ang public service. Ang nakataya rito ay kinabukasan ng tiwala ng susunod na henerasyon sa ating demokrasya.” RNT/MND
