MANILA, Philippines – Isang naaagnas na bangkay ng 19-anyos na babae na naiulat na nawawala sa loob ng tatlong araw ang natagpuan sa isang masukal na bahagi sa Sitio Cangcaya, Barangay Poblacion sa Alcoy, Cebu noong Miyerkules, Mayo 27.
Kalaunan ay kinilala ng pulisya ang biktima na si Jean Oropesa Belardo sa kabila ng pagsubok dahil nasa advanced state of decomposition na ang bangkay.
Ayon sa mga awtoridad, nasa kustodiya na nila ang isang 42-anyos na suspek na nakilala lamang sa alyas na “Anton,” na itinuturong may kaugnayan sa pagkamatay ni Belardo.
Sinabi ni Alcoy Municipal Police Station chief Police Major Jose Nilo Abello na na-intercept ang suspek bandang alas-8 ng umaga habang papaalis sana patungong Dalaguete kasama ang kanyang pamilya sakay ng traysikel.
Ayon sa pulisya, nagsimula ang imbestigasyon matapos i-report na nawawala si Belardo ng kanyang common-law partner nang hindi ito umuwi sa loob ng tatlong araw. Nag-file rin ng missing person report ang kanyang kapatid noong Martes ng hapon, Mayo 26.
Natuklasan din ng mga awtoridad na nawawala ang tablet ng biktima. Natunton ang device sa Dalaguete na nagdala sa pulisya sa isang bahay sa Barangay Balud kung saan ito nabawi.
Ayon sa pulisya, ang lead ay tumuro sa suspek na kilala rin bilang “Abat” na kalaunan ay inimbitahan para sa pagtatanong.
Sa simula, nagbigay ang suspek ng magkakasalungat na salaysay, sinabing ipinangsanla niya ang device bago kalaunan ay umaming ipinagbili ito sa Dalaguete. Inamin din umano niya na pinatay niya si Belardo sa pamamagitan ng pananaksak.
Ayon sa pulisya, itinuro rin ng suspek ang lugar kung saan niya umano itinapon ang kutsilyong ginamit sa krimen, na natagpuan sa masukal na bahagi sa Barangay Guiwang. Inamin din umano nito na sinunog niya ang damit na suot niya nang mangyari ang insidente.
Ayon sa imbestigasyon, huling nakitang buhay si Belardo na sumakay sa traysikel ng suspek malapit sa boundary ng Barangays Guiwang at Atabay noong Mayo 23. Traysikel drayber ang suspek.
Tinitingnan din ng mga awtoridad ang posibleng motibo ng robbery at posibleng panggagahasa.
Ayon sa pulisya, dati nang may mga reklamo laban sa suspek kaugnay ng umano’y pangha-harass sa mga babaeng pasahero at mga naunang kaso ng attempted rape, bagama’t hindi ito pormal na naisampa.
Patuloy ang imbestigasyon habang hinihintay ang resulta ng autopsy at tinutukoy pa ang eksaktong sanhi ng kamatayan at kung nagkaroon ng sexual assault.
Inihahanda na ng pulisya ang kaukulang kaso laban sa suspek. Mary Anne Sapico
