MANILA, Philippines – Kabilang si Ramil Madriaga, na nagpakilalang dating aide at umano’y “bagman” ni Vice President Sara Duterte, sa 25 testigong planong iharap ng House prosecution panel sa impeachment trial laban sa bise presidente.
Ayon kay Batangas Rep. Gerville Luistro, lead prosecutor ng impeachment case, kabilang si Madriaga sa mga ihaharap kaugnay ng kontrobersyal na confidential funds ng Office of the Vice President (OVP).
Matatandaang sinabi ni Madriaga sa pagdinig ng House Committee on Justice na naubos umano sa loob ng 24 oras ang P125 milyong confidential funds ng OVP sa utos umano ni Duterte.
Kasama rin umano sa witness list ang ilang bank officials na may kaalaman sa mga bank account ni Duterte at ng kanyang asawa kaugnay ng umano’y covered at suspicious transactions na tinukoy ng Anti-Money Laundering Council (AMLC).
Ayon kay Bicol Saro Party-list Rep. Terry Ridon, hihilingin nila sa impeachment court na ma-subpoena ang mga bank account ng bise presidente.
“Mayroon po kaming listahan ng mga bangko at account numbers po ng ating Pangalawang Pangulo at ng kanyang asawa,” ani Ridon.
Kasama rin sa mga posibleng tumestigo sina dating Sen. Antonio Trillanes IV at mga opisyal mula sa AMLC, SEC, Ombudsman at NBI.
Mayroon ding tinatawag na “hostile witnesses” na dati umanong konektado sa OVP at Department of Education noong kalihim pa si Duterte.
Samantala, iginiit ni Luistro na dapat personal na dumalo ang mga senator-judges sa impeachment trial at sa botohan.
“This is very sacred, this is very solemn,” ani Luistro.
Target ng Senado na simulan ang impeachment trial ni Duterte sa Hulyo 6. RNT/JGC
